Ադրբեջանցի էստրադային երգչուհի Ռաքսանա Իսմայիլովայի նկատմամբ հայտարարվել է հետախուզում: Նրան մեղադրում են խարդախության մեջ: Այս մասին հայտնում է Vesti.az-ը՝ հղում անելով ոստիկանության Սուրախանիի շրջանային վարչությանը:
Ներկայում իրականացվում են նրա ձերբակալմանն ուղղված միջոցառումներ:
Երգչուհուն կասկածում են հանցավոր գործունեության 5 դրվագներում: Մասնավորապես, մի քանի տարի առաջ նա 5000 մանաթ է վերցրել (մեկ մանաթը համարժեք է մեկ եվրոյի) Բինագադինսկի շրջանի բնակչուհուց՝ խոստանալով օգնել նրա դստերը համալսարան ընդունվել: Խոստումը չի կատարվել, գումարն էլ հրաժարվել է վերադարձնել:
Տուժել է նաև քաղաքացի Վեյսովը, որին երգչուհին անցած տարվա գարնանը խոստացել է Գարադագսկի շրջանում աշխատանքի տեղավորել 8000 մանաթի դիմաց, սակայն խոստումը կրկին չի կատարել:
Մեկ այլ բնակչի նա իբր պատրաստվել է հողակտոր վաճառել և 4000 մանաթ է վերցրել, սակայն գնորդը հողակտորի փաստաթղթերը այդպես էլ չի ստացել:
Իսմայիլովայի դեմ քրեական գործ էր հարուցվել դեռևս 2012-ի սեպտեմբերին: Նրան բազմիցս ոստիկանություն են կանչել, սակայն նա չի հայտնվել: 2013-ի սկզբին երգչուհին իր ընտանիքով լքել է Ադրբեջանն ու տեղափոխվել Մոսկվա:
Նա մեկնաբանել է հետախուզման մեջ լինելու տեղեկությունը՝ ասելով, որ ինքը ցնցված է, քանի որ իրեն զրպարտել են: Ներկայում նրա փաստաբանը հայտարարություն է պատրաստում ԶԼՄ-ների համար:
Նշվում է, որ նրա քույրն ու մայրը նախկինում խնդիր են ունեցել օրենքի հետ: Նրանք Ադրբեջանից աղջիկներ են տարել Թուրքիա՝ նրանց ստիպելով այնտեղ մարմնավաճառությամբ զբաղվել: Երգչուհու մայրը դատապարտվել է պայմանական, իսկ քույրը՝ 2 տարվա ազատազրկման:
