Երեկվա Սերժ Սարգսյանի երդմնակալության արարողությունը մի շարք քաղաքացիների համար վերածվել էր իսկական մղձավանջի, քանի որ կաթվածահար էր եղել տրանսպորտային երթևեկը: «Հայկական ժամանակը» գրում է, որ օրվա ամենաթեժ ժամերին փակվել էին ամենաբանուկ փողոցները: Մասնավորապես Մաշտոց պողոտայում հանրային տրանսպորտին սպասող մարդիկ ստիպված եղան նախ լսել ոստիկանների կիսաբարկացած ձայները, որոնք հեռացնում էին բոլոր մեքենաները, հետո 30 րոպե կանգնել սպասել, մինչև Սերժ Սարգսյանի շքախումբը անցնի այդ փողոցով, որ հասնի իր նստավայր:
«Կարեն Դեմիրճյանին սպանեցին, հիմա էլ իրա անվան համալիրում երդում ա ուտում, գոնե տեղ չանեին»,- բարկացած ասում էր կանգառում երթուղայինի սպասող մի կին և շարունակում՝ ախր սխալ է ստեղ կանգնելը, հիմա էն մարդիկ, որոնք դրսից են եկել, տեսնեն՝ չեն հասկանա, որ մենք տրանսպորտի ենք սպասում, կասեն՝ տեսեք ինչքան են սիրում իրենց նախագահին, կանգնել՝ դիմավորում են: Նրան լսող մեկ այլ կին էլ առաջարկեց. «Եկեք մեջքով կանգնենք, որ հասկանան, որ մենք իրա համար չենք կանգնել»: Այդ միտքը մի քանիսի դուրը եկավ, բայց այդպես էլ մոռացվեց, քանի որ նոր թեմա բացվեց խոսելու՝ անձրև է սպասվում:
