Ինչպես գրում է Московские новости թերթը, իրավապահ մարմիններին հաջողվել է պարզել Եվգենի Կասպերսկու որդուն առևանգողների գտնվելու վայրը` հետևելով նրանց հեռախոսազանգերին: 20-ամյա Իվան Կասպերսկին ապրիլի 19-ից պահվում էր Մերձմոսկովյան շրջաններից մեկում:
Ոստիկանությունը հայտնել է, որ այս օպերացիան փայլուն է անցել և առանց որևէ կրակոցի: Դա տեղի է ունեցել նաև առևանգողներին ապատեղեկատվությամբ թյուրիմացության մեջ գցելու միջոցով, ինչը ոստիկաններին թույլ է տվել առևանգողներին «համոզել», որ իրենք չգիտեն տղայի և հանցագործների գտնվելու վայրը:
Իվան Կասպերսկու առևանգման մասին տեղեկություններ հայտնվելուն պես ԶԼՄ-ներում կեղծ տեղեկություն տարածվեց, իբր նրան ազատ են արձակել դեռ ապրիլի 22-ին, սակայն պաշտոնապես այդ լուրը չհաստատվեց:
Քննչական գործողությունների հետևանքով պարզվել է, որ երիտասարդին պահում են հատուկ վարձված մասնավոր տանը Սերգիև-Պասադի շրջանում:
Ապրիլի 24-ին հայտնի դարձավ նրա ազատ արձակման մասին:
Հանցագործները 3մլն դոլարի փրկագին էին պահանջել, ինչպես նաև պահանջել էին չկապվել ոստիկանության հետ: Իր առևանգման մասին Կասպերսկին ինքն էր հայտնել հանցագործների պահանջով` զանգահարելով իր իսկ հեռախոսից:
Սկզբնական շրջանում բանակցությունները վարում էին «Կասպերսկու գիտահետազոտական կենտրոնի» անվտանգության համակարգի ներկայացուցիչները և ԱԴԾ-ում Կասպերսկու ընկերները, սակայն ապրիլի 21-ին նրանք ստիպված եղան դիմել իրավապահ մարմիններին, քանի որ այդ տեղեկությունը հայտնվեց լրատվամիջոցներում: Այս մասին գրում է Коммерсантъ:
Կասպերսկու որդու առևանգման գործով ձերբակալվել է 5 մարդ, այդ թվում՝ նաև կազմակերպիչը: Ձերբակալվածների հանդեպ քրեական գործ է հարուցվել «մարդու առևանգում» և «դրամաշորթություն» հոդվածներով: