Ամերիկացի սկանդալային պաստոր Թերի Ջոնսը, որը հայտնի է իր արմատական հակաիսլամական տրամադրություններով, պատրաստվում է ոչնչացնել Ղուրանի բազում օրինակներ՝ ի հիշատակ 2001-ի սեպտեմբերի 11-ին ԱՄՆ-ում տեղի ունեցած ահաբեկչական հարձակումների զոհերի: Այս մասին գրում է Washington Times թերթը:
«2013 թվականի սեպտեմբերի 11-ին մենք կայրենք Ղուրանի 2998 օրինակ՝ հիշելու նրանց, ովքեր սպանվեցին արմատական իսլամիստների կողմից»,- ասվում է պաստորի գլխավորած «Վե´ր կաց, Ամերիկա» կազմակեպության մամլո հաղորդագրության մեջ:
Այրվող գրքի օրինակների թիվը համապատասխանում է ողբերգության զոհերի թվին: Ակցիան տեղի կունենա երեկոյան ժամը 5-ին՝ Տամպա-Բեյում (Ֆլորիդա):
Թերի Ջոնսի անունը հայտնի է դարձել ողջ աշխարհին 2011-ի մարտի 20-ին, երբ նա մոտ 50 մարդու ներկայությամբ Ֆլորիդայի եկեղեցիներից մեկում Ղուրանի օրինակ այրեց:
2012-ին նա իր կողմնակիցների հետ կրկնեց ակցիան: Արմատական գործիչները պաստորի հասցեին սպառնալիքներ են ուղղել: Եգիպտոսի դատարանը նրան հեռակա կարգով դատապարտել է մահվան՝ Մուհամմեդ մարգարեի մասին երգիծական ֆիլմի ստեղծմանը մասնակցելու համար:
