Քաղաքացիական պատերազմում հաղթելու դեպքում Ասադի բանակը կարող է դառնալ ամենափորձառուն ամբողջ Մերձավոր Արևելքում: Այս մասին գրում է բրիտանական The Independent պարբերականը:
Համաշխարհային հանրությունը շարունակում է քննարկել Սիրիայում ռուսական ռազմական արշավի սկիզբը՝ մոռանալով արաբական հողում մի ինստիտուտի մասին, որը շարունակում է գործել և պաշտպանել պետությունը, որին Մոսկվան որոշել է աջակցել: Խոսքը սիրիական բանակի մասին է: Սիրիական բանակը, որին ընդամենը մի քանի ամիս առաջ չէին բավարարում մարդիկ ու զենքերը, հանկարծ անցել է հարձակման:
Ինչպես նշում է The Independent-ը, այս տարի ավելի վաղ այդ բանակն ամբողջովին դուրս էին գրել հաշվից՝ բոլորին համոզելով, որ Բաշար Ասադի կառավարությունը վերջին օրերն է ապրում:
Այդ պահին իրավիճակին միջամտեց Ռուսաստանը՝ արմատապես փոխելով այն: Սիրիական զորքերն անցել են հարձակման: Եթե սիրիական բանակը հաղթի, եթե այն պահպանի իր ամբողջականությունը և կարողանա պահել անձնակազմի բավական մեծ թիվը, այն ընթացիկ պատերազմից դուրս կգա որպես ամենափորձառու ու մարտերում ամրացած արաբական բանակն ամբողջ Մերձավոր Արևելքում: «Եվ վայ նրա այն հարևաններին, որոնք այդ մասին մոռանում են»,- գրում է պարբերականը:
