Քիչ առաջ Կարեն Դեմիրճյանի անվան մարզահամերգային համալիր եկավ ԱԺ պատգամավոր, ԲՀԿ խմբակցության անդամ, ԲՀԿ ղեկավար Գագիկ Ծառուկյանի խնամի Մուրադ Գուլոյանը: «Առաջին լրատվական»-ի հարցին՝ կուսակցական որոշում եղե՞լ է, որ ԲՀԿ անդամները մասնակցեն Սերժ Սարգսյանի երդմնակալությանը, նա չցանկացավ պատասխանել:
«Առաջին լրատվական»-ի հաջորդ հարցին՝ արդյոք Գագիկ Ծառուկյանի հետ համաձայնեցրե՞լ է իր մասնակցությունը, նա պատասխանեց. «Հեռու գնացեք»:
Մուրադ Գուլոյանից հետո Մարզահամերգային համալիր եկան ԲՀԿ քվոտայով սպորտի և երիտասարդության հարցերի նախարար Հրաչ Ռոստոմյանը և առողջապահության նախկին նախարար Հարություն Քուշկյանը: Նրանք նույնպես չցանկացան պատասխանել մեր հարցերին՝ արդյոք այցը համաձայնեցրե՞լ են ԲՀԿ առաջնորդ Գագիկ Ծառուկյանի հետ:
Մարզահամերգային համալիր եկավ նաև ԲՀԿ պատգամավոր Մարտուն Գրիգորյանը:
Մարզահամերգային համալիր եկան նաև ԲՀԿ խմբակցության պատգամավոր Գրիգոր Մարգարյանը (Բելաջոյի Գրիշը) և Արայիկ Աղաբաբյանը:
Գրիգորի Մարգարյանը ասել է, որ որ եկել է մասնակցելու ԱԺ հատուկ նիստին, որի ժամանակ տեղի է ունենալու Հանրապետության նախագահի երդմնակալության արարողությունը: «Ի՞նչ է, Դուք տեղյակ չեք այսօր ինչ է կատարվում, ՀՀ նախագահի երդմնակալության արարողությունն է և ես՝ որպես ՀՀ քաղաքացի մասնակցում եմ այս արարողությանը»: Իսկ Արայիկ Աղաբաբյանը պատասխանեց, որ մասնակցում է ԱԺ հատուկ նիստին:
