Examiner կայքի փոխանցմամբ, Լոս Անջելեսի հայերը բողոքի ակցիա են անցկացրել Թուրքիայի հյուպատոսարանի առջև: Այդ ընթացքում թուրքական հյուպատոսարանը կենդանության նշաններ ցույց չի տվել:
Բողոքի ակցիան կազմակերպել է «Հայ երիտասարդների միությունը» (AYF, Armenian Youth Federation), դրա համար էլ ակցիայի մասնակիցների շարքերում գերակշռել են երիտասարդները:
Նրանք իրենց պաստառների ու հագուստների վրա գրել են հետևյալ արտահայտությունները. «Այո´, դա Ցեղասպանություն է», «Դա երբեք չի կրկնվելու», «Ամո՛թ Թուրքիային», «Մենք երբեք չենք մոռանա – մենք պահանջում ենք միջազգային ճանաչում», «Արևելյան Թուրքիան հավասար է Արևմտյան Հայաստանին», «Վե´րջ թուրքական օկուպացմանը»:
AYF-ի խոսնակ Ռազմիկ Սարգսյանի հաշվարկով, բողոքի ակցիային մասնակցել է մի քանի հազար մարդ: Նրա խոսքերով` ցուցարարների կիրքը պայմանավորված է նրանով, որ նախ հայ երիտասարդները հասկանում ու գնահատում են ավագ սերնդի կրած զրկանքները, և բացի այդ, Թուրքիան սերնդեսերունդ շարունակում է հերքել Հայոց ցեղասպանության գործում իր ունեցած պատասխանատվությունը:
