ՀՀԿ խմբակցության անդամները որոշել են Ընտրական օրենսգիրքը համապատասխանեցնել արդեն գործող իրողություններին: Հայաստանում արդեն տևական ժամանակ ընտրողները ընտրություններին մասնակցում են նույնականացման քարտերով, որը համարվում է անձնագրին համարժեք փաստաթուղթ: Բայց ի տարբերություն անձնագրի, որի մեջ դրվում է ջնջվող թանաքով դրոշմակնիք, ինչը վկայում է, որ ընտրողը արդեն մասնակցել է տվյալ ընտրությանը, նույնականացման պլաստիկ քարտի վրա դրոշմակնիք դնելու հնարավորություն չկա:
Հովհաննես Սահակյանի, Արտակ Դավթյանի, Գագիկ Մինասյանի և Գագիկ Մելիքյանի կողմից ներկայացված Ընտրական օրենսգրքում լրացումներ կատարելու մասին նախագծում առաջարկվում է Ընտրական օրենսգրքի 66-րդ հոդվածի 4-րդ կետը լրացնել հետևյալ բովանդակությամբ՝ «Նույնականացման քարտով քվեարկությանը մասնակցելիս՝ նույնականացման քարտում տվյալ ընտրությանը մասնակցելու վերաբերյալ դրոշմակնիքի բացակայությունը չի ստուգվում, իսկ նույնականացման քարտը չի դրոշմակնքվում»:
Գործող օրենքով քվեարկության ծրարը կնքող ընտրական հանձնաժողովի անդամը նախ պետք է ստուգի թե տվյալ անձի անձնագրում չկա՞ արդյոք տվյալ ընտրությանը մասնակցելու դրոշմակնիք, և միայն դրա բացակայության մեջ համոզվելուց հետո է հնարավորություն տալիս ընտրողին ծրարը գցել քվեատուփը:
Այս նորմը Ընտրական օրենսգրքում մտցվել էր կրկնակի քվեարկությունները բացառելու համար: Հայաստանի վերջին մի քանի համապետական ընտրությունների ժամանակ դրոշմակնիքների թանաքի որակի հարցը միշտ եղել է ամենաքննարկվողներից մեկը, քանի որ ընդդիմադիր կուսակցությունների կամ թեկնածուների շտաբները մշտապես հայտարարել են, որ անձնագրերը կնքվել են այնպիսի թանաքով, որ դրոշմակնիքը անհետացել է 20 րոպեից, ինչը հնարավորություն կտար ընտրողին մի քանի անգամ նույն անձնագրով մասնակցել ընտրությանը: Ընտրական հանձնաժողովները միշտ արդարացել են, որ դա կարող է պատահականություն լինել, և ոչ թե միտումնավորության արդյունք, սակայն փաստ է, որ դրոշմակնքումը մնում էր կրկնակի քվեարկության դեմ պայքարի և վերահսկողության գոյություն ունեցող լավագույն միջոցը:
Առաջին անգամ նույնականացման պլաստիկ քարտերը ընտրություններում մասսայաբար օգտագործվեցին այս տարվա գարնանը Աբովյանում կազմակերպված քաղաքապետի ընտրություններում: ՀՀԿ-ից հեռացված և իշխանության թեկնածուի դեմ պայքարող Արթուր Հարությունյանը դեռ նախընտրական շրջանում մտահոգություն ուներ, որ նույնականացման պլաստիկ քարտերը կարող են օգտագործվել կրկնակի քվեարկությունների կազմակերպման համար: Ընտրություններից հետո նա հայտարարեց, որ իր մտահոգությունը տեղին էր, որովհետև պարզվել է, որ աբովյանցիները Հայաստանում ամենաշատը նույնականացման քարտ ունեցողներն են: Ինչ-որ մեկը նախապես հոգ էր տարել որ հնարավորինս շատ մարդ նույնականացման քարտ ստանա, որպեսզի կարողանա ներգրավվել կրկնակի քվեարկության սխեմայում: Այն ժամանակ, ինչպես և մինչև օրս, Ընտրական օրենսգրքով չէր կարգավորվում նույնականացման քարտի դրոշմակնքման հարցը, և նույնականացման քարտով ընտրության գնալը ինչ-որ իմաստով հակասում էր Ընտրական օրենսգրքին, քանի որ Ընտրական օրենսգիրքը իմպերատիվ պահանջ է դնում դրոշմակնքել անձնագիրը:
Սահմանադրական փոփոխությունների հանրաքվեից առաջ ՀՀԿ-ական պատգամավորները առաջարկում են լրացում կատարել Ընտրական օրենսգրքում, որպեսզի նույնականացման քարտով ընտրությանը մասնակցելը և այն չդրոշմակնքելը չդիտվի օրենքի խախտում: Միայն թե այս դեպքում հարց է առաջանալու, թե ինչպես կարելի է վերահսկել և կանխել կրկնակի քվեարկությունները: Մյուս կողմից էլ՝ մեր երկրում օրինականությունն ու ժողովրդավարությունը այնպիսի մի մակարդակի են հասել, որ որևէ մեկի մտքով չի կարող անցնել իշխանությանը մեղադրել կրկնակի քվեարկությունների կազմակերպման կամ խրախուսման մեջ: Չէ՞ որ իշխանություններն իրենք են անընդհատ և հետևողական պայքարում նման դրսևորումների դեմ: Սահմանադրական հանրաքվեի ժամանակ ևս մենք ականատես կլինենք անզիջում պայքարի հանուն ազատ և թափանցիկ քվեարկության:
