Վրացական Apsny.ge կայքի փոխանցմամբ, Սուրբ Զատկի կապակցությամբ Վրաստանի նախագահ Միխեիլ Սաակաշվիլին ներում է շնորհել 266 բանտարկյալի: Նրանցից 227-ն ազատության մեջ են հայտնվել հենց շաբաթ օրը:
Բացի այդ, համաներման տակ ընկածներից 24-ի պատժաչափը կրկնակի անգամ կրճատվել է, 2-ի վրայից հանվել է քրեական գործը, իսկ 13-ի պատժաչափերն ուղղակի կրճատվել են:
Հիշեցնենք, որ Լոնդոնի թագավորական քոլեջի գիտնականների կողմից մշակված World Prison Population List (բանտերի բնակչության համաշխարհային ցուցակ)-ի համաձայն` Վրաստանը աշխարհի 217 երկրների ցանկում 6-րդ տեղն է զբաղեցնում, քանի որ երկրում 100.000 մարդուն 538 բանտարկյալ է բաժին ընկնում:
Վրաստանում եղած 18 բանտերից 9-ում բանտարկյալների թիվը գերազանցում է թույլատրելի սահմանը: Այսպես, Թբիլիսիի թիվ 1 բանտում, որը 750 բանտարկյալների համար է նախատեսված, այժմ շուրջ 1200 կալանավոր կա, իսկ Բաթումի բանտում բանտարկյալների թիվը 715 է` նախատեսված 557-ի փոխարեն:
Վրաստանի ժողովրդական պաշտպանի՝ օմբուդսմեն Գեորգի Տուգուշիի տվյալներով, անցյալ տարի 142 մարդ է մահացել բանտում, որոնցից 42-ը թոքախտով են տառապել:
