Սմարթֆոնների օգտատերերը գործնականում ոչինչ չեն կարող անել, որպեսզի հատուկ ծառայություններին թույլ չտան ստանալ «ամբողջական վերահսկողություն» իրենց հեռախոսի վրա: Այս մասին հայտարարել է հատուկ ծառայությունների գործունեությունը բացահայտած Էդվարդ Սնոուդենը:
Հատուկ ծառայությունների նախկին աշխատակիցը BBC-ին տված հարցազրույցում ասել է, որ Մեծ Բրիտանիայի կառավարական կապի վարչությունը (GCHQ) հնարավորություն ունի կոտրել հեռախոսները՝ առանց օգտատիրոջ գիտության:
Ըստ նրա՝ GCHQ-ը կարող է հեռախոսի նկատմամբ հասանելիություն ստանալ՝ դրան ուղարկելով ծածկագրված տեքստային հաղորդագրություն, որից հետո հատուկ ծառայությունները կարող են լսել այն ամենը, ինչ կատարվում է շուրջը, ինչպես նաև լուսանկարել:
Մեծ Բրիտանիայի կառավարությունը հրաժարվել է մեկնաբանել այս հայտարարությունը:
Սնոուդենը նշել է, որ GCHQ-ն օգտվում է, այսպես կոչված, Smurf suite-ից՝ գաղտնալսման գաղտնի մեթոդների «հավաքածուից», որն իր անվանումն ստացել է ի պատիվ բելգիացի նկարչի պատկերած կապույտ էակների:
Dreamy Smurf-ն իրենից ներկայացնում է հեռախոսի «սնուցման» համակարգի կառավարման գործիք, ինչը նշանակում է, որ «ձեր հեռախոսը կարող է անջատվել ու միանալ առանց ձեր գիտության»,- ասել է նա:
«Հետքրքրասեր սմուրֆը» կառավարում է բարձրախոսը: Օրինակ՝ երբ ձեր հեռախոսը գրպանում է, ապա GCHQ-ը կարող է միացնել բարձրախոսը և լսել այն ամենը, ինչ կատարվում է ձեր շուրջը:
Tracker Smurf-ը թույլ է տալիս ձեզ լրտեսել մեծ ճշգրտությամբ:
Paranoid Smurf-ը նույնիսկ մասնագետներին թույլ չի տալիս հասկանալ, որ հեռախոսի հետ ինչ-որ բան այն չէ:
