Եգիպտոսի իշխանություններն ակնկալում են, որ երկրին 4.8 միլիարդ դոլարի ֆինանսական օգնություն տրամադրելու վերաբերյալ Արժույթի միջազգային հիմնադրամի հետ վերջնական համաձայնություն ձեռք կբերվի երկու շաբաթվա ընթացքում: Ինչպես հաղորդում է Reuters գործակալությունը, այս մասին հայտարարել է Եգիպտոսի ծրագրավորման հարցերով նախարար Աշրաֆ Ալ-Արաբին:
Նա նշել է, որ երկրի իշխանությունները մտադիր են խնդրել հատկացվող միջոցների ավելի մեծ ծավալ:
Հիշեցնենք, որ 2013թ. ապրիլի 3-ին ԱՄՀ-ի փորձագետները ժամանել են Կահիրե՝ երկրին ֆինանսական օգնություն տրամադրելու հարցը քննարկելու համար: Վարկային պայմանագրի մասին հարցը նախատեսվում էր քննարկել 2012թ. դեկտեմբերին, ապա 2013թ. հունվարին, սակայն քննարկումը հետաձգվել է Եգիպտոսում տիրող անկայուն քաղաքական վիճակի պատճառով:
Եգիպտոսի կառավարությունը մեծ հույսեր է կապում միջազգային կազմակերպությունից հավելյալ ֆինանսավորում ստանալու հետ, քանի որ ներկայում երկիրն ունի բյուջեի մեծ դեֆիցիտ:
Դրա հետ մեկտեղ մտավախություն կա, որ ԱՄՀ-ը կպահանջի Եգիպտոսի բյուջեի ծախսերի կրճատում, ինչը կարող է դառնալ նոր ցույցերի և անկարգությունների պատճառ:
