Պարագվայի նախագահի պարտականությունները կատարող Ֆեդերիկո Ֆրանկոն «հրաշք» է համարել Վենեսուելայի նախագահ Ուգո Չավեսի մահը: Այս մասին հաղորդում է RIA Novosti-ն՝ հղում կատարելով լատինաամերիկյան ԶԼՄ-ներին:
«Հրաշք է, որ պարոն Չավեսը անհետացավ երկրի երեսից, քանի որ նա շատ վատ բան է արել իմ երկրի համար»,- հայտարարել է Ֆրանկոն Մադրիդի ֆորումում:
Ֆրանկոյի խոսքով՝ Չավեսը աջակցել է «Պարագվայցի ժողովրդի բանակ» ապստամբական շարժմանը, ինչը նշանակում է՝ պատասխանատվություն է կրում այդ խմբավորման սպանությունների և առևանգումների համար:
Վենեսուելայի և Պարագվայի հարաբերությունները սրվեցին, երբ 2012թ. հունիսին պաշտոնից հեռացվեց երկրի նախկին նախագահ Ֆերնանդո Լուգոն:
Երկրի ղեկավարի պաշտոնը մինչ ընտրությունները զբաղեցնում է փոխնախագահ Ֆրանկոն: Այդ որոշումը քննադատության արժանացավ շատ երկրների կողմից, իսկ Վենեսուելան ավելի հեռուն գնաց՝ երկրից վտարելով պարագվայցի դիվանագետներին:
Ի պատասխան՝ Պարագվայը չեղյալ հայտարարեց Կարակասի հետ երկկողմ պայմանագիրը այցագրերի վերաբերյալ:
Վենեսուելայի ԱԳՆ ղեկավարը կոշտ է արձագանքել Ֆրանկոյի հայտարարություններին՝ նրան անվանելով Լատինական Ամերիկայի վերջին պուտչիստը:
