France Presse լրատվական գործակալության փոխանցմամբ՝ Ֆրանսիայի դատախազությունը նախնական հետաքննություն է սկսել Volkswagen ընկերության դեմ՝ կապված խոշոր չափի խարդախությունների հետ։ Այդ մասին գործակալությանը հայտնել է դատախազությունում նրա աղբյուրը։
Տվյալ որոշումն ընդունվել է տեղական իշխանությունների զեկույցի և կոնցեռնի վերաբերյալ սկանդալի մասին բաց հրապարակումների հիման վրա։ Նախնական հետաքննություն սկսելու մասին որոշումն ընդունվել է նախօրեին։
ԱՄՆ իշխանությունները սեպտեմբերի կեսին Volkswagen-ին մեղադրել են դիզելային ավտոմեքենաները հատուկ ծրագրով ապահովելու համար, որը նվազեցրել է վնասակար նյութերի արտանետման ցուցանիշը։ Ամերիկյան կառավարությունը կոնցեռնին պարտավորեցրել է հետ կանչել Volkswagen և Audi մոդելի 482.000 մարդատար ավտոմեքենաներ։ Դրանից բացի, ընկերությանը սպառնում է 18,075 մլրդ դոլարի տուգանք:
