Գերմանիայում ՀՀ դեսպան Աշոտ Սմբատյանը սեպտեմբերի 30-ին աշխատանքային այցով եղել է Գերմանիայի Սաքսոնիա-Անհալթ երկրամասի մայրաքաղաք Մագդեբուրգում: Ինչպես տեղեկացրին ՀՀ արտաքին գործերի նախարարության մամուլի, տեղեկատվության եւ հասարակայնության հետ կապի վարչությունից, այցի շրջանակներում դեսպանը հանդիպում է ունեցել Սաքսոնիա-Անհալթ երկրամասի վարչապետ Ռայներ Հազելոֆի հետ: Զրույցի ընթացքում կողմերը քննարկել են Հայաստանի հետ երկրամասի համագործակցության հեռանկարները՝ հատկապես տնտեսության ու զբոսաշրջության բնագավառներում և հետաքրքրություն ներկայացնող մի շարք այլ խնդիրներ: Հանդիպման ավարտին դեսպան Սմբատյանը գրառում է կատարել Սաքսոնիա-Անհալթ երկրամասի կառավարության պատվավոր հյուրերի գրքում:
Այցի ընթացքում դեսպանին հյուրընկալել է նաև Սաքսոնիա-Անհալթ երկրամասի խորհրդարանի (Լանդթագի) նախագահ Դեթլեֆ Գյուրթը: Զրուցակիցները բարձր են գնահատել Հայաստանի և Սաքսոնիա-Անհալթ երկրամասի միջև գիտակրթական և մշակութային հարաբերությունների ներկայիս մակարդակը և կարևորել են երկկողմ փոխգործակցության զարգացումը նաև տնտեսության բնագավառում:
Մագդեբուրգ կատարած այցի շրջանակներում դեսպանը հանդիպում է ունեցել նաև Մագդեբուրգի քաղաքապետ Լուտց Թրումփերի հետ: Քաղաքապետը գոհունակությամբ է նշել, որ արդեն առկա են երկկողմ ուսումնական փոխանակման ծրագրեր: Ընթացիկ տարում Հայաստանից ճանաչողական այցով արդեն ժամանել է դպրոցականների մի խումբ, իսկ հաջորդ տարի պատասխան այցով Մագդեբուրգից ևս խումբ է մեկնելու Հայաստան: Հանդիպման ավարտին դեսպան Սմբատյանը գրառում է կատարել Մագդեբուրգի քաղաքապետարանի հյուրերի «Ոսկե գրքում»:
