Գեղարքունիքի մարզի ընդհանուր իրավասության դատարանում Յուրիկ Իսկոյանի նախագահությամբ ավարտվել է Լեռնիկ Պետրոսյանի ու նրա հինգ հանցընկերների գործի դատական քննությունը:
Վեց ամբաստանյալների գործողություններից մեկ տուժած կա՝ աղջիկը՝ Ասյան (անունը փոխված է), ում փորձել են առևանգել՝ Լեռնիկի հետ ամուսնության նպատակով:
Ըստ դատական ակտի՝ 2014 թվականի դեկտեմբերին մահացել է Լեռնիկի հայրը: Լեռնիկն ապրել է հիվանդ մոր հետ: Ցանկացել է ամուսնանալ:
2015 թվականի հունվարին իրենց գյուղում հարսանյաց մի խնջույքում 30-ամյա Լեռնիկը տեսել է 23-ամյա հարսնաքրոջը՝ Ասյային, ու շատ է հավանել: Որոշել է ամուսնանալ հենց նրա հետ:
Փետրվար-մարտ ամիսներին Լեռնիկն իր հարազատների հետ գնացել է խնամախոսության, խնդրել են աղջկա ձեռքը, բայց աղջկա ծնողները չեն համաձայնել, աղջկա հայրն ասել է, թե տվյալ պահին հարսանիք անելու ֆինանսական հնարավորություններ չունի: Լեռնիկն աղջկա հետ չի շփվել, նրա ցանկությունների մասին տեղյակ չի եղել, բայց չի էլ համակերպվել մերժման հետ:
Նա իմացել է, որ ապրիլի 7-ի տոնի առթիվ Ասյան իր ընտանիքի անդամների հետ այցելելու է ամուսնացած քրոջը:
Լեռնիկը որոշել է, թե վրա է հասել հարմար պահը, որ ամուսնության նպատակով առևանգի Ասյային:
Նա այս մտադրության մասին հայտնել է իր մորաքրոջ որդիներ Արմանին ու Վահանին, նաև իր քրոջ ամուսին Սարմենին, խնդրել է, որ նրանք օգնեն աղջկա առևանգումը գլուխ բերելու հարցում:
Տղամարդիկ համաձայնության են եկել, Վահանին պատկանող «Մերսեդեսով» գնացել են իրենց բնակավայրի գազալցակայանի տարածք:
Այդ ընթացքում Լեռնիկն իր մտադրության մասին հայտնել է նաև մյուս քրոջ ամուսին Հայրապետին, նրան հեռախոսազանգով կանչել է նույն լցակայան: Վերջինս իր մեքենայով ներկայացել է:
Այդ ընթացքում առևանգողների «բանակը» համալրել է նաև համագյուղացի Սևակը, ով իր օգնությունն է խոստացել ու համագյուղացի Հակոբի «ՎԱԶ-2121»-ով նույնպես շտապել է հավաքատեղի՝ գազալցակայան:
Ապրիլի 7-ի առավոտյան Ասյան իր հարազատների հետ մեքենայով գնացել է նոր ամուսնացած քրոջն այցի: Ժամը 18-ի սահմաններում բարեկամական այցն ավարտվել է, Ասյան ու իր հարազատները իրենց տուն մեկնելու նպատակով մեքենայով գնացել են հիշյալ գազալցակայան՝ մեքենան լիցքավորելու:
Ասյան իր քրոջ ու եղբոր հետ մեքենայից դուրս է եկել, քայլել են դեպի սպասասրահ:
Բայց այդ ժամանակ գազալցակայանի տարածքում գտնվող Լեռնիկը, Արմանը, Սարմենը, Հայրապետը, Սևակն ու Վահանը միահամուռ ուժերով Ասյային առևանգել են, նրա կամքին հակառակ նրան քաշելով՝ նստեցրել են Վահանի «Մերսեդեսը»:
Սևակը բռնել է Ասյայի քրոջ ձեռքից ու թույլ չի տվել, որ նա օգնի քրոջը, իսկ Հայրապետը բռնել է Ասյայի եղբորը:
Ասյայի քույրը պոկվել, իրեն գցել է այն մեքենայի մեջ, ուր ստիպողաբար նստեցրել էին Ասյային: Քույրը պինդ բռնել է Ասյայի ձեռքից: Լեռնիկը պահանջել է, որ նա իջնի մեքենայից, բայց քույրը չի իջել: Երկու քույրերին «Մերսեդեսով» տեղափոխել են Չարենցավան:
Սևակը համագյուղացու մեքենայով վերադարձել է իրենց գյուղ, Հայրապետն էլ իր մեքենայով է հեռացել: Համարել են, որ աղջկան փախցրին-պրծան:
Սակայն առևանգումից մեկուկես ժամ անց ոստիկանները առևանգողներին ու առևանգվածին հայտնաբերել և տարել են Չարենցավանի ոստիկանություն:
Առևանգման ընթացքում թեթև վնասի հատկանիշներ չպարունակող վնասվածքներ ստացել են ոչ միայն առևանգվող աղջիկն ու նրա քույրը, այլև՝քրեծվածքների տեսքով աղջիկների կողմից վնասվածքներ է ստացել նաև առևանգող երիտասարդը՝ Լեռնիկը:
Վեց ամբաստանյալներին մեղադրանք է առաջադրվել ՀՀ քրեական օրենսգրքի 131 հոդվածի 2-րդ մասի 1-ին կետով:
Առևանգման «գործընթացը» տեսանկարահանվել է գազալցակայանում տեղադրված տեսաձայնագրող սարքի կողմից:
Տուժող աղջիկը նկարագրել է, որ առևանգման ժամանակ Լեռնիկը գազալցակայանում իջել է մեքենայից, երկու ձեռքերով մեջքի կողմից բռնել է իրեն, Արմանի ու Սարմենի օգնությամբ իր կամքին հակառակ, ուժի գործադրմամբ իրեն նստեցրել են Վահանի մեքենան…
Տուժող աղջիկը ամբաստանյալների նկատմամբ դատարանում բողոք չի հայտնել:
Առևանգողներից չորսը անչափահաս երեխաների հայրիկներ են, ինչը դատարանը հաշվի է առել պատիժ նշանակելիս:
Վեց ամբաստանյալներն իրենց մեղավոր են ճանաչել, զղջացել են:
Ընդհանուր իրավասության դատարանը նրանց բոլորին դատապարտել է 4-ական տարի ազատազրկման, կիրառել է պայմանական դատապարտություն և յուրաքանչյուրի համար սահմանել է 1 տարի փորձաշրջան:
