Ներկա պահին Յուրի Վարդանյանը գտնվում է հետվիրահատական շրջանում,և բժիշկները նրա վիճակը գնահատում են ծանր: Քիչ առաջ այս մասին մեզ հետ զրույցում նշեց առողջապահության նախարար Հարություն Քուշկյանի մամլո խոսնակ Շուշան Հունանյանը:
Հիշեցնենք, որ լեգենդար ծանրամարտիկ, Հայաստանի նախագահի խորհրդական Յուրի Վարդանյանը գտնվում է «Էրեբունի» բժշկական կենտրոնի վերակենդանացման բաժանմունքում:
Մի քանի օր առաջ Յուրի Վարդանյանը մեկնել էր Մոսկվա, որտեղ կոտրվել էր նրա ազդրում տեղադրված մետաղյա ձողը: Նոր վիրահատություն է պահանջվել Երևանում, սակայն վիրաբույժները ստիպված են եղել դադարեցնել վիրահատությունը ուղեղի թթվածնային սնուցման հետ կապված խնդիրների պատճառով: Տվյալ պահին Վարդանյանը դեռևս կոմայի մեջ է, բժիշկները նրա վիճակը գնահատում են «կայուն ծանր»:
Բացի այդ, Յուրի Վարդանյանը 2010թ. հոկտեմբերի 8-ի երեկոյան վթարի էր ենթարկվել Երևան-Գյումրի ավտոմայրուղու վրա: Նրա մեքենան բախվել էր տրակտորի, որը տեսանելիության վատ պայմաններում լուսարձակներն անջատած կայանել էր ճանապարհին:
