Ռուս օլիգարխ Բորիս Բերեզովսկու մոտ ընկերուհին՝ Կատերինա Սաբիրովան, հաստատել է Վլադիմիր Պուտինին հղված նամակի գոյությունը, որում Բերեզովսկին ներողություն է խնդրել ՌԴ նախագահից և հայրենիք վերադարձի հնարավորություն հայցել: Սաբիրովայի հարցազրույցը լույս կտեսնի The New Times-ի ապրիլմեկյան համարում: Հարցազրույցից Facebook-ում հատվածներ է հրապարակել The New Times-ի գլխավոր խմբագիր Եվգենիա Ալբացը:
«Այո, ես տեսել եմ նամակի ձեռագիր տեքստը: Նա ինձ համար կարդացել է դա: Նա ներողություն է խնդրել և վերադարձի հնարավորություն հայցել»,- Սաբիրովային մեջբերում է թերթը:
Նա պատմել է, որ Բերեզովսկին հեռախոսով ժամերով քննարկել է նամակ գրելու մտահղացումը իր կնոջ՝ Ելենա Գորբունովայի հետ: Սաբիրովայի խոսքով՝ օլիգարխը հայտարարել է, որ դա նրա միակ հնարավորությունն է: 2012-ի վերջին Սաբիրովան Բերեզովսկու առանձին արտահայտություններից հասկացել է, որ նա արդեն նամակն ուղարկել է Կրեմլ և պատասխանի է սպասում:
Աղջիկը, որի հետ օլիգարխը մտերիմ է եղել իր կյանքի վերջին մի քանի ամիսներին, հաստատում է, որ դատարանում Ռոման Աբրամովիչին պարտվելուց հետո Բերեզովսկին դեպրեսիայի մեջ էր, դադարել էր տանից դուրս գալ, գրեթե ոչ մեկի հետ չէր շփվում, ասում էր՝ չգիտի, թե ինչ է լինելու հետագայում:
Այնուհանդերձ, Սաբիրովան կասկածում է, որ նա կարող էր ինքնասպանության դիմել: Մարտի 22-ին՝ մահից մեկ օրից էլ քիչ ժամանակ առաջ, Բերեզովսկին զանգահարել է նրան և հայտնել, որ Թել Ավիվ է մեկնում, որտեղ նրանք պետք է հանդիպեին օդանավակայանի VIP սրահում: Սաբիրովայի խոսքով՝ ձայնը սովորականից լավ էր:
Այն մասին, որ Բերեզովսկին Պուտինին նամակ է գրել՝ խոստովանելով իր սխալները, գործարարի մահից հետո հայտնել էր ՌԴ նախագահի մամլո քարտուղար Վլադիմիր Պեսկովը:
