Այսօր գյուղնախարարության անասնաբուծության և տոհմային գործերի վարչության պետ Աշոտ Հովհաննիսյանը տեղեկացրեց մեզ, որ հիմա կառավարությունը մշակում է ոչխարաբուծության զարգացման ծրագիր, և եթե հաստատի, մենք եվրոպական երկրներից կներկրենք համաշխարհային ճանաչում ունեցող մսատու և կաթնատու ցեղերի էգ և արու գառներ: Դրանք կհատկացվեն ոչխարաբուծությամբ զբաղվող առաջատարներին, որպեսզի կարողանանք և՛ այդ ցեղի մաքուր բուծումը մեզ մոտ կազմակերպել, և՛ այդ լավ տոհմային ցեղերը տրամախաչել տեղական ցեղերի հետ, որպեսզի բարձրացնենք կաթնատվությունն ու գառնատվությունը, քանի որ դրանք ունեն մինչ 75 տոկոս զույգ գառներ բերելու հատկանիշ, իսկ մեր ոչխարների զույգատվությունը ընդամենը 10 տոկոս է:
Աշոտ Հովհաննիսյանի խոսքերով, վերջին տարիներին ոչխարների արտահանման պահով Հայաստանը բավական լավ շուկա է, և տարեկան շուրջ 200 հազար գլուխ կարող ենք արտահանել: Բարեբախտաբար, մեր երկրի ազգաբնակչության նախասիրությունը չի համպատասխանում Իրանի ժողովուրդների նախասիրություններին: Եթե մենք գերադասում ենք գառան միս, նրանք գերադասում են հասակավոր ոչխարի միս՝ 40 կգ-ից բարձր կենդանի զանգված:
Իսկ 40 կգ-անոց մեծ ոչխարները մեզ մոտ չեն օգտագործում, որովհետև ծանր, սուր համ ունեն, սպեցիֆիկ հոտ է գալիս, որը շատանում է ոչխարի տարիքի մեծանալուն զուգահեռ։ Արդեն 6-7 ամսականների դեպքում դա ակնհայտ է լինում: Դրա համար էլ մեր ժողովուրդը գառ է նախընտրում, ինչքան գառ կա՝ մենք ուտում ենք, իսկ ինչը չենք ուտում՝ արդեն պարսիկներն ու արաբներն են տանում:
Մեր հարցին, թե մի պահ ոչխարների արտահանումը Իրան և արաբական երկրներ դադարեցվել էր, արդյոք շարունակվո՞ւմ է, թե՞ ոչ, Աշոտ Հովհաննիսյանը պատասխանեց. «Դա կապված էր դաբաղ հիվանդության հետ, հիմա արդեն նորից շարունակվում է: Հիմա նորից կսկսվի, քանի որ իրենք ուզում են 40 կգ-ից բարձր, իսկ մեր գառները 40 կգ-ի հասնում են օգոստոս-սեպտեմբեր ամիսներին, և այդ ժամանակ կսկսվի մասսայական արտահանումը»:
