Վրացական Georgia times կայքի փոխանցմամբ, Վրաստանի նախկին նախագահ Էդուարդ Շևարդնաձեն անդրադարձ է կատարել 2012 թվականին Ռուսաստանում կայանալիք նախագահական ընտրություններին.
«Իմ կարծիքով, Վրաստանին առավել ձեռնտու է Պուտինի` նախագահ դառնալու տարբերակը: Պետք է հիշել, որ Ռուսաստանի ներկայիս նախագահ Դմիտրի Մեդվեդևը հրաժարվեց Վրաստանի նախագահ Միխեիլ Սաակաշվիլիի հետ բանակցելուց:
Բացի այդ, ուշադրության արժանի է այն հանգամանքը, որ հենց Վլադիմիր Պուտինն է ժամանակին ընդունել վրացական ընդդիմության առաջնորդներին: Ես չեմ բացառում, որ նախագահ դառնալուց հետո Պուտինը բանակցություններ կվարի Սաակաշվիլիի հետ: Պուտինն առավել լոյալ է տրամադրված վրացիների հանդեպ»:
Հիշեցնենք, որ օրեր առաջ էլ Շևարդնաձեն հայտարարեց, թե Վրաստանի տարածքային ամբողջականության վերականգնման համար կպահանջի 10-12 տարի: Նա նաև Սաակաշվիլիին խորհուրդ էր տվել Ռուսաստանի նախագահ Դմիտրի Մեդվեդևի հետ անձնական հանդիպում խնդրել ` ընդգծելով , որ դա Վրաստանի խնդիրների լուծման միակ ճանապարհն է, և որ Ռուսաստանը շատ ազդեցիկ երկիր է, որպեսզի որևէ մեկը կարողանա նրա վրա ճնշում գործադրել:
