Գերմանիայի հավաքականի նախկին ֆուտբոլիստ Լոտար Մատեուսն իր կարծիքն է հայտնել Մյունխենի «Բավարիա»-ի կիսապաշտպան Մարիո Գյոտցեի խնդիրների վերաբերյալ: Գերմանիայի հավաքականի ֆուտբոլիստը հաճախ չէ ընդգրկվում մյունխենցիների մեկնարկային կազմում, մինչդեռ ազգային թիմում հիանալի է դրսևորում իրեն: Գերմանիայի ֆուտբոլային հասարակության շրջանում Գյոտցեի խաղն ամենաարդիական թեմաներից մեկն է:
«Կարծում եմ՝ Գյոտցեի խնդիրները հիմնականում հոգեբանական բնույթ ունեն: Հնարավոր է, նա շատ է կենտրոնանում այս ամենի վրա: Դորտմունդի «Բորուսիա»-ում նրա համար ավելի հեշտ կլիներ: Նա ավելի վստահ կլիներ և ավելի մեծ բավականություն կստանար խաղից:
Անվիճելի է, որ ֆուտբոլիստին խանգարում է միտքը, որ կարող է 10-15 րոպե մասնակցել խաղին կամ խաղադաշտ դուրս գալ մյուս ֆուտբոլիստների վնասվածքների ժամանակ: Գյոտցեն, հավանաբար, չի կարողանում ազատվել այդ մտքերից»,- tz-ը մեջբերում է Մատեուսի խոսքերը:
