Այսօր Հնդկաստանի կենտրոնում՝ լեփ-լեցուն ռեստորանում գազի բալոնի պայթյունի հետևանքով մահացել է առնվազն 104 մարդ: Վիրավորների թիվը 60-100 մարդ է: Հզոր պայթյունը որոտացել է Պեթլավադում, որը գտնվում է Մադհյա Պրադեշ նահանգի Ջաբուա շրջանում: Այդ պայթյունը համարվել է վերջերս Հնդկաստանի պատմության մեջ ամենաարյունոտ ողբերգությունը՝ հաղորդում է RFI-ն:
Զոհերի մեծ թվի պատճառը ողբերգության վայրի մարդաշատ լինելն էր, որը տեղի է ունեցել տեղական ժամանակով 8:30-ին: Պայթյունը որոտացել է նախաճաշի ժամանակ, երբ ռեստորանը լի է եղել այցելուներով: Ռեստորանի կողքին նաև տեղակայված է ավտոբուսի կանգառ, որը ևս բազմամարդ է եղել:
Պայթյունի պատճառով փլուզվել է նաև ռեստորանի հարևանությամբ գտնվող շենքը, ևս մի քանի տներ վնասվել են:
Նշվում է նաև, որ ռեստորանի շենքում կամ հարևան տանը, հնարավոր է, պահեստավորված են եղել դինամիտային պայթագլանիկներ՝ նախատեսված հանքերում օգտագործման համար: Դրանով է բացատրվում նաև զոհերի մեծ թիվը:
