«Մենք ունենք մի իրավիճակ, որը պահանջում է հանգուցալուծում: Այսպես շարունակելը լավ բան չի խոստանում: Հանգուցալուծում կարող է լինել միայն քաղաքական դաշտում, քաղաքական համաձայնությամբ: Ինչ-որ մի բան կարծես շարժվել է, մի պահ անջրպետն ավելի խորն էր»,- այսօր ասուլիսի ժամանակ հայտարարեց ԱԺ ՀՅԴ խմբակցության քարտուղար, ՀՅԴ ԳՄ փոխներկայացուցիչ Աղվան Վարդանյանը՝ անկախ ամեն ինչից դրական գնահատելով ներկա գործընթացը, թեև, ըստ նրա, փոխադարձ նամակների բովանդակությունը շատ ավելի խորն է:
Ըստ նրա՝ գործող իշխանությունը պակաս պատասխանատվություն չպետք է ունենա առկա իրադրության համար, որովհետև կարող է վեց ամիս հետո այլ բան տեղի ունենալ:
Ա. Վարդանյանը կրկին հիշեցրեց ՀՅԴ ճանապարհային քարտեզը, որով առաջարկվող սահմանադրական փոփոխություններից հետո հնարավոր կլինի անցում կատարել կառավարման խորհրդարանական համակարգի. «Նախագահական ընտրությունների դեպքում տեսնում ենք՝ ինչ է լինում»:
«Թող բանակցեն, լավ է, որ սկսվել է, տեսնենք՝ ինչով կավարտվի»,- ասաց Ա. Վարդանյանը:
Հարցին՝ որտե՞ղ կլինի ապրիլի 9-ին ՀՅԴ-ն, Ա. Վարդանյանը պատասխանեց հարցով. «Դուք գիտե՞ք, թե որտեղ կլինի այդ օրը Րաֆֆի Հովհաննիսյանը: Օրը կգա՝ բարին հետը»:
Նա չհամաձայնեց, որ ՀՅԴ-ն բացակայում է Ազատության հրապարակից. «Երկու անգամ հանրահավաքում ելույթներ ենք ունեցել, մենք այն տեսակը չենք, որ միկրոֆոնը տեսնենք, վազենք խոսենք… եթե ասելիք կա և ծրագրային, կարելի է առաջ տանել, մենք դա կասենք: Մենք շփումների մեջ ենք Րաֆֆի Հովհաննիսյանի և նրա շրջապատի հետ: Բայց չիմանալով Րաֆֆի Հովհաննիսյանի անելիքները՝ դու չես կարող ասել մի բան, ու հետո Րաֆֆի Հովհաննիսյանն անի մեկ այլ բան»: