Ամերիկայի «Հայ փաստաբանների միությունը»՝ ի դեմս միության նախագահ Կարո Ղազարյանի, միացել է «Ժառանգություն» կուսակցության առաջնորդ Րաֆֆի Հովհաննիսյանին շարժմանը:
Օրեր առաջ Երևանի կենտրոնում՝ Ազատության հրապարակում, Րաֆֆի Հովհաննիսյանի հանրահավաքի ժամանակ «Հայ փաստաբանների միության» նախագահ Կարո Ղազարյանը ևս ելույթ էր ունեցել՝ շնորհավորելով Րաֆֆի Հովհաննիսյանին որպես «նորընտիր նախագահ»: Ամերիկահայ իրավաբանը քաղաքական կուսակցություններին, միություններին, համայնքներին, դպրոցներին ու բարեգործական կազմակերպություններին կոչ էր արել միանալ «նորընտիր նախագահ» Րաֆֆի Հովհաննիսյանին և նրա պայքարին: Նա նշել էր, որ Հայաստանը փոխելու եզրին ենք: «Տարիներ շարունակ հայ ժողովուրդը շատերի կողմից քննադատվել է, որ չի կարողանում տեր կանգնել իր իրավունքներին: Հիմա նրանք ոտքի են կանգնել ու քվեարկել իրենց կամքով»,- «Ազատության» հրապարակում իր ելույթներից մեկում ասել էր Կարո Ղազարյանը:
Ամերիկահայ իրավաբան, ԱՄՆ «Հայ փաստաբանների միության» անդամ Էդգար Մարտիրոսյանի կարծիքով՝ փոքր-ինչ ծիծաղելի է, որ «Հայ փաստաբանների միությունը», որը 1989թ. հիմնվել է Րաֆֆի Հովհաննիսյանի կողմից, իր դիրքորոշումն է ներկայացնում 2013թ. փետրվարի 18-ին կայացած նախագահական ընտրությունների վերաբերյալ: «Առաջին լրատվական»-ի հետ զրույցում Էդգար Մարտիրոսյանը հիշեցրեց, որ «Հայ փաստաբանների միության» (Armenian Bar Association) պաշտոնական կայքէջում հստակ ամրագրված է, թե որն է միության առաքելությունը. այն է՝ լուծել հայ համայնքի իրավական խնդիրները և խրախուսել Հայաստանում ժողովրդավարական ինստիտուտների կայացումը:
«Պարզ է, որ հայերը՝ Հայաստանում, թե Սփյուռքում, մտահոգված են ՀՀ-ում վերջերս տեղի ունեցած նախագահական ընտրությունների օրինականությամբ, իսկ հետընտրական շարժումը ժողովրդավարության ուղղությամբ հերթական փոքր քայլն է: Այս տեսանկյունից ես ողջունում եմ Կարո Ղազարյանի ամուր դիրքորոշումն ընդդեմ շարունակական ու արդեն մշակույթ դարձած ընտրակեղծարարության: Այն փաստը, որ այս դիրքորոշումը հնչել է Ազատության հրապարակից՝ խնդիր չէ, քանի որ աջակցություն է Հայաստանում դեմոկրատական արժեքներին, որոնցից զուրկ է Հայաստանի քաղաքացին: Բայց ես կարծում եմ, որ ՀՓՄ-ը կարող էր իր աջակցությունը հայտնել Ազատության հրապարակում առանց ծայրահեղ արտահայտությունների դիմելու, ինչպիսին էր Րաֆֆի Հովհաննիսյանին «ընտրված նախագահ» անվանելը: Սա արժանացել է բազում քննադատությունների: Այս անհիմն հայտարարության հետ ես ինքս էլ բոլորովին համամիտ չեմ»,- տեսակետ հայտնեց ամերիկահայ իրավաբանը՝ շարունակելով, որ նման հայտարարությունները կանդրադառնան ՀՓՄ գործունեության նկատմամբ հանրային վստահության և քաղաքական հավասարակշռվածության վրա:
Ըստ Էդգար Մարտիրոսյանի՝ եթե Հովհաննիսյանը հաղթել է ընտրություններում, ապա հարց է առաջացնում, թե արդյոք ՀՓՄ-ը կկարողանա՞ փաստացի ապացուցել, որ Հովհաննիսյանն իսկապես ստացել է ընտրողների ձայների կեսից ավելին:
Անդրադառնալով 2008թ. նախագահական ընտրություններին և հետընտրական զարգացումներին՝ Մարտի 1-ին, Էդգար Մարտիրոսյանն ասաց, որ Կարո Ղազարյանն այդ ժամանակ չէր զբաղեցնում ՀՓՄ նախագահի պաշտոնը: «Եթե հիշողությունս ինձ չի դավաճանում, ՀՓՄ-ն, իբրև կազմակերպություն, լռություն պահպանեց 2008-ի ընտրությունների և Մարտի 1-ի դեպքերի վերաբերյալ: Իհարկե, ընտրակեղծիքները մտահոգեցնող էին նաև այն ժամանակ, ավելին՝ 2008-ին տեղի ունեցած ընտրակեղծիքները ամենացայտունն էին բոլոր ընտրությունների համեմատ: 2008-ից ի վեր համապատասխան պաշտոններ զբաղեցրած և կարծիք բարձրաձայնած անդամների դիրքորոշումը չի համընկնում կազմակերպության այսօրվա դիրքորոշման հետ: Այս հակասությունները պետք է բացատրություն ստանան հենց իրենց՝ միության ներկայացուցիչների, պաշտոնյաների կողմից»,- ասաց Էդգար Մարտիրոսյանը:
