Բարոնուհի Քերոլայն Քոքսն այսօր լրագրողների հետ հանդիպման ժամանակ ամփոփելով իր ղեկավարած հայ-բրիտանական խմբի եռօրյա այցը Հայաստան տեղեկացրեց, որ երեկ իրենք այցելել են Լեռնային Ղարաբաղ և հանդիպել այնտեղի իշխանությունների հետ: Քոքսը շնորհակալություն հայտնեց իր գործընկերներին, որոնք անձամբ իր հետ մեկնեցին Ղարաբաղ` հաշվի չառնելով այն հանգամանքը, որ Ադրբեջանը ճնշումներ է գործադրում նրանց վրա, ովքեր այցելում են Ղարաբաղ: Քոքսը նշեց, որ Ադրբեջանը լավ բան չի անում, «վնասում է ինքն իրեն և դա էլ վկայում է, որ նրանք վախենում են ճշմարտությունից»:
Բարոնուհին դրվատանքի խոսքեր հղեց ԼՂ ժողովրդին այս տարիների ընթացքում արձանագրած առաջընթացի համար:
ԼՂ հարցի կարգավորմանն անդրադառնալով, բարոնուհի Քոքսը նշեց, որ իրենք տեղեկացել են, թե Մինսկի խմբի գործունեության շրջանակներում ինչպիսի զարգացումներ են եղել. «Տեղեկացանք նաև, որ հայերը և Լեռնային Ղարաբաղն են ամենմամեծ զիջումները արել Մինսկի խմբի գործընթացի ժամանակ Սա շատ լուրջ հարց է։ Ես չեմ ուզում խոսել ԼՂ ժողովրդի անունից, բայց ես կարծում եմ որ ԼՂ ժողովուրդը պիտի իրավունք ունենա մասնակցել բանակցային գործընթացին»:
Բարոնուհին նկատեց, որ Հայաստանը կամք է ցուցաբերել շարժվել եղած սկզբունքների հիման վրա և պետք է Ադրբեջանն էլ անի դա և համագործակցի: