Ոստիկանության քննչական գլխավոր վարչության Արարատի մարզի քննչական բաժնի Մասիսի քննչական բաժանմունքում նյութեր են նախապատրաստվում երեկ՝ մարտի 22-ին, Արարատի մարզում տեղի ունեցած խոշոր ավտովթարի փաստով։
Ինչպես հայտնում է shamshyan.com-ը, նյութերի նախապատրաստման ընթացքում պարզվել է, որ Երևան քաղաքի Նոր Խարբերդի Ամառանոցներ 24 փողոցի բնակիչ, 37-ամյա Համբարձում Հովհաննիսյանը, վարելով Mercedes ML մակնիշի 33 TL 461 համարանիշի ավտոմեքենան, Երևան-Արտաշատ խճուղու Այնթափ գյուղի վարչական տարածքում բախվել է Երևան քաղաքի Ն. Տիգրանյան փողոցի բնակիչ, 33-ամյա Զորիկ Պողոսյանի վարած «Վազ 21-09» մակնիշի 19 ՍՍ 683 համարանիշի ավտոմեքենային։
Վթարի հետևանքով «Վազ 21-09-ի վարորդ Զ. Պողոսյանը և Mercedes ML-ի ուղևոր, Երևանի Շենգավիթ վարչական շրջանի Նոր Խարբերդ 6-րդ փողոցի բնակիչ, 33-ամյա Արման Վիրաբյանը մարմնական վնասվածքներով տեղափոխվել են «Էրեբունի» բժշկական կենտրոն, իսկ ուղևորներից 1 հոգի էլ առաջին բուժօգնությունը ստանալուց հետո գնացել է տուն։
Ըստ տեղեկությունների, Mercedes ML-ի վարորդ Հ. Համբարձումյանը աշխատում է Պետական եկամուտների կոմիտեում։
Երեկ՝ մարտի 22-ին, խոշոր ավտովթար էր տեղի ունեցել Արարատի մարզում:
Ժամը 20:00-ի սահմաններում Երևան-Արտաշատ խճուղու Այնթապ գյուղի վարչական տարածքում բախվել են Mercedes ML մակնիշի 33 TL 461 համարանիշի և «ՎԱԶ 21-09» մակնիշի 19 ՍՍ 683 համարանիշի ավտոմեքենաները:
Վթարի հետևանքով Mercedes-ը դուրս է եկել հանդիպակաց գոտի, բախվել 12/15 խանութի պատին, այնուհետև գովազդային վահանակին, իսկ «ՎԱԶ 21-09»-ը դուրս է եկել երթևեկելի գոտուց և հայտնվել ջրատար առվակի մեջ:
Վթարի հետևանքով 3 հոգի տեղափոխվել էին հիվանդանոց:
Վթարի վայր էին ժամանել Ճանապարհային ոստիկանության 2-րդ սպայական գումարտակի 1-ին վաշտի աշխատակիցները՝ վաշտի հրամանատար Տիգրան Գրիգորյանի գլխավորությամբ:
Տեղում էր նաև ՃՈ 2-րդ սպայական գումարտակի հրամանատարի տեղակալ Սասուն Սարգսյանը:
Վիրավորներին առաջինը օգնություն էին ցուցաբերել գյուղացիները:
Ժամանել են նաև ՀՀ Արատակարգ իրավիճակների նախարարության Փրկարար ծառայության Մասիսի հրշեջ փրկարարական ջոկատը՝ 1 մարտական հաշվարկով:
Փաստի առթիվ Ոստիկանության քննչական գլխավոր վարչության Արարատի մարզի քննչական բաժնի Մասիսի քննչական բաժանմունքի քննիչի կողմից նյութեր են նախապատրաստվում:
Կարճ ժամանակում դեպքի վայր էին ժամանել «ՎԱԶ 21-09»-ի ապահովագրական «Ռոսգոստրախ» ընկերության արագ արձագանքման խմբի ներկայացուցիչները, իսկ Mercedes ML-ի ապահովագրական ընկերության ներկայացուցիչները, ովքեր «Նաիրի ինշուրանս» ապահովագրական ընկերությունից են, երկու ժամից ավելի չէին բարեհաճել ժամանել վթարի վայր, ինչից հետո ճանապարհի նշված վայրում խցանումը վերացնելու նպատակով քննիչի հանձնարարականով՝ մեքենաները տեղափոխվել էին Մասիսի բաժին:
