Վրաստանի նախագահ Միխեիլ Սաակաշվիլին քաղաքականությունից չի հեռանա, երբ 2013-ի հոկտեմբերին ավարտվի նրա նախագահական լիազորությունների ժամկետը՝ հայտնել է ինքը՝ նախագահը, «Իմեդի» հեռուստաալիքին տված հարցազրույցում: Նրա խոսքով՝ ինքը կհեռանար, եթե անցած տարվա հոկտեմբերին կայացած խորհրդարանական ընտրություններում հաղթեր իր գլխավորած «Միացյալ ազգային շարժում» կուսակցությունը: Նրա խոսքով՝ այսօր առաջին հերթին անհրաժեշտ է փրկել Վրաստանի ժողովրդավարական համակարգն ու թույլ չտալ կործանում: Այս մասին հայտնում է RBK-ն:
Սաակաշվիլին հրաժարվել է հստակեցնել, թե ինչ դեր կկատարի Վրաստանի քաղաքական դաշտում 2013-ի հոկտեմբերի նախագահական ընտրություններից հետո, որին իր կուսակցությունը կառաջադրի սեփական թեկնածուի: «Վրացի ժողովուրդը կորոշի, թե ով ուր է գնում, և թե ով ուր է վերադառնում»,- ընդգծել է Սաակաշվիլին:
Նշենք, որ Վրաստանի խորհրդարանը միաձայն՝ 123 ձայնով , երկրորդ ընթերցմամբ ընդունել է սահմանադրական փոփոխությունները, որոնք սահմանափակում են նախագահի իրավասությունները: Համաձայն ուղղումների՝ նախագահը միայնակ չի կարող ցրել կառավարությունը: Դրա համար պետք է խորհրդարանի համաձայնությունը: Խորհրդարանի արձակման դեպքում կառավարությունը կշարունակի կատարել իր լիազորությունները մինչև նոր խորհրդարանը կձևավորի նոր կաբինետ:
Ներկայում գոյություն ունի սահմանադրական նորմ, որով նախագահը իրավունք ունի ցրել խորհրդարանը, և առանց սպասելու նոր խորհրդարանական ընտրություններին՝ կառավարություն ձևավորել: Ինչպես սպասվում է, մարտի 25-ին խորհրդարանը կողմ կքվեարկի օրինագծի ընդունմանը:
