Հայաստանում մարդիկ շատ ավելի գոհ են իրենց կյանքից, քան Եվրոպական հարևանության և գործընկերության մյուս 6 երկրներում։
«Ազատություն» ռադիոկայանի փոխանցմամբ՝ Եվրամիությունը հարցումներ է անցկացրել Եվրոպական հարևանության և գործընկերության 7 երկրներում ` Հայաստանում, Ադրբեջանում, Վրաստանում, Բելառուսում, Մոլդովայում, Ուկրաինայում և Ռուսաստանում՝ պարզելու քաղաքացիների տրամադրությունները առկա իրավիճակի և սպասելիքների հետ կապված:
ԵՄ Հարևանության բարոմետրը փաստում է, որ հարցմանը մասնակցած Հայաստանի քաղաքացիների 67 տոկոսը լիովին գոհ են իրենց կյանքից, մինչդեռ հետազոտության մեջ ներառված մյուս երկրներում այս ցուցանիշը չի գերազանցում 47 տոկոսը:
Փոխարենը` հայաստանցիների 61 տոկոսը վստահ է, որ երկրում գործընթացները սխալ ուղղությամբ են գնում, մինչդեռ հարևանության մյուս 6 երկրներում այդպես է կարծում միայն բնակչության 41 տոկոսը:
Հայաստանցիների վերաբերմունքը ԵՄ նույնպես ամենաբարձրն է հարևանության մյուս երկրների համեմատությամբ: Համաձայն ԵՄ հարևանության բարոմետրի` հարցվածների շուրջ 90 տոկոսը ԵՄ համարում է Հայաստանի կարևոր գործընկեր, շուրջ 70 տոկոսը կիսում է եվրոպական արժեքները ու վստահում եվրոպական բարեփոխումներին: Հայաստանում 2 անգամ ավելի հարցվածներ են համարում, որ ԵՄ հետ հարաբերությունները լավն են:
«Հայաստանում անցկացված հարցումների արդյունքներով պարզվել է, որ Հայաստանը ԵՄ համարում է կար ևոր գործընկեր և կցանկանար, որ նրա հետ կապերը գնալով սերտանային և որ ԵՄ ավելի մեծ դեր խաղար բարեփոխումների անցկացման հարցում», – ասել է Հայաստանում ԵՄ պատվիրակության ղեկավար, դեսպան Տրայան Հրիսթեան։
Ինչ վերաբերում է տնտեսական ներկա իրավիճակին, աշխատանքային և ընտանեկան դրությանը, ապա հայաստանցիների պատկերացումները շատ չեն տարբերվում մյուս երկրների բնակիչներից: Նրանք բոլորն էլ հիմնականում դժգոհ են իրենց երկրի տնտեսական իրավիճակից: Տնտեսական ճգնաժամի հետևանքների հետ կապված հայաստանցիները բոլորից վատատես են. հայերի շուրջ 60 տոկոսը վստահ է, որ «վատ օրերը» դեռ առջևում են` փաստում է ԵՄ հարևանության բարոմետրը:
