Ռուսական RIA Novosti լրատվական գործակալության փոխանցմամբ՝ Ռուսաստանը Վրաստանում ՆԱՏՕ-ի կենտրոնի բացումը գնահատում է որպես դաշինքի սադրիչ ու ապակայունացնող լուրջ գործոն։ Այդ մասին լրագրողների հետ զրույցում հայտարարել է ՌԴ ԱԳՆ-ի պաշտոնական ներկայացուցիչ Մարիա Զախարովան:
«Վրաստան կատարած ՆԱՏՕ-ի գլխավոր քարտուղար պարոն Սթոլթենբերգի այցի ժամանակ բացվել է ՆԱՏՕ-Վրաստան նախապատրաստական ու գնահատման համատեղ կենտրոն։ Կենտրոնի բազայում նախատեսվում է անցկացնել ՆԱՏՕ-ի անդամ երկրների, Վրաստանի զինված ուժերի, ինչպես նաև դաշինքի գործընկեր երկրների ստորաբաժանումների զորավարժություններ ու վարժանքներ՝ օպերատիվության, համատեղելիության ու համակարգման բարձրացման համար։
Մենք այդ քայլը գնահատում ենք որպես դաշինքի սադրիչ քաղաքականության շարունակում, որը միտված է նրա աշխարհաքաղաքական ազդեցությունն ընդլայնելուն, ընդ որում՝ հաճախ դաշինքի գործընկեր երկրների ռեսուրսների օգտագործմամբ։ Վրաստանում ՆԱՏՕ-ի նման ռազմական օբյեկտի տեղակայումը կդառնա տարածաշրջանի համար անվտանգության լուրջ ապակայունացնող գործոն»,- ասել է Մարիա Զախարովան։
