Ադրբեջանական Trend.az կայքի փոխանցմամբ, Ադրբեջանի նախագահական ապարատի արտաքին կապերի բաժնի պետ Նորուզ Մամեդովը պատասխանել է ԵՄ-ի ընդլայնման հարցերով եվրահանձնակատար Շտեֆան Ֆյուլեին, ով ադրեջանական իշխանություններին քննադատության էր ենթարկել քաղաքացիական ազատությունների սահմանափակման համար.
«Ցավով նշում եմ, որ ապրիլի 17-ի չարտոնված ցույցի կապակցությամբ Ֆյուլեի արած անհապաղ հայտարարությունը «չի համապատասխանում» իրականությանը և ի ցույց է դնում ԵՄ-ի «անարդար» մոտեցումը մեր երկրում տեղի ունեցող իրադարձությունների հանդեպ: Այդ հայտարարությունն արվել է «սխալ» տեղեկությունների հիման վրա:
Ադրբեջանը «որևէ խնդիր չունի» մարդկանց ազատ արտահայտվելու և հանրահավաքներ կազմակերպելու հարցերում: Լրագրողների գործունեությունը «ոչ մի կերպ» չի խոչընդոտվում, նրանք «ազատորեն» օգտվում են իրենց իրավունքներից:
Ադրբեջանը «հավատարիմ» է միջազգային ու տարածաշրջանային կազմակերպությունների ու կառույցների առջև իր ստանձնած պարտավորություններին: Սակայն երկրում ընթացող գործընթացների նկատմամբ ԵՄ-ի «ոչ համարժեք» դիրքորոշումը «հակասում» է ԵՄ-ի ու Ադրբեջանի միջև ձևավորված համագործակցության ոգուն»:
Հիշեցնենք, որ ապրիլի սկզբին գերմանական Frankfurter Rundschau թերթում տպագրված Նադյա Էրբի «Կովկասում պատերազմի վտանգի առաջացումը» խորագրով հոդվածում նշված էր, որ ԵՄ-ը աչք է փակում պատերազմի հրձիգ Ադրբեջանի ռազմական պատրաստությունների ու այդ երկրում մարդու իրավունքների կոպիտ ոտնահարման դեպքերի վրա, քանի որ Ադրբեջանը հանդիսանում է Կենտրոնական Ասիայից դեպի Եվրոպա նավթի մատակարար և կարևոր գործընկեր Nabucco նախագծի իրականացման հարցում:
