Այսօր Պոեզիայի համաշխարհային օրն է: Տոնին նվիրված՝ լրագրողների հետ հանդիպեց գրող, հրապարակախոս Մարինե Պետրոսյանը: Նրա խոսքով՝ այսօրվա հայ գրականությունը ոչնչով չի զիջում համաշխարհային գրականությանը, և եթե համեմատելու լինենք՝ մենք մի շարք երկրներից ավելի լավ պոեզիա ունենք:
«Շատերի պատկերացմամբ՝ այսօր հայ ժամանակակից գրականություն չկա, սակայն այդպես չէ. ուղղակի այն նեղ շրջանակներում է և դուրս չի գալիս»,- ասաց նա:
Մ. Պետրոսյանի խոսքով՝ Հայաստանում փակ են ստեղծագործությունները արվեստագետներին հասցնելու ճանապարհները, և սա գրականության գլխավոր խնդիրներից է:
Մեկ այլ խնդիր է նաև այն, որ գրականություն ասելով՝ միանգամից հիշում են Գրողների միությունը, այնինչ գրականությունը Գրողների միությունում չէ. «Ես չեմ ողջունում Լևոն Անանյանի՝ պոեզիայի միջազգային փառատոն կազմակերպելու ու Մաշտոցի պուրակը պոեզիայի պուրակի վերածելու մտահղացումը: Այդ միջոցառումների ընկալումներն այլ կլինեն, որովհետև Անանյանը իշխանական իմիջ ունի»:
