Ազատամարտիկ Վարդան Թումանյանին ծեծելով սպանած Ջունգլ մականունով Գևորգ Սարգսյանը իր ազգական, նույն գործով ամբաստանյալ Սարգիս Ղուկասյանի հետ վերջերս փորձել է հատել սահմանը, ապօրինաբար լքել Հայաստանի տարածքը, սակայն վթարի են ենթարկվել: Այս մասին «Առաջին լրատվական»-ի հետ զրույցում ասաց ազատամարտիկի քույրը՝ Մարիետա Թումանյանը՝ հավելելով, որ դա իրենց տեղեկությունն է, որը իրենք դատարանին հորդորել են լրացուցիչ պարզել, քանի որ ամբաստանյալները 2 դատական նիստ է, չեն ներկայանում, թեև պատշաճ իրազեկված են:
«Այո՛, մենք հավաստի աղբյուրից գիտենք, որ այդ մարդասպանները փախուստի փորձ են արել, բայց վթարի են ենթարկվել ու վնասվածքներ ունեն: Դրա համար էլ նիստերին չեն գալիս: Այդ Ջունգլը իր շրջապատում ասել է, որ գլորվել են ձորը, մեքենան գարմոշկա է դարձել, ու իրենք ջարդուխուրդ են եղել»,- ասաց տիկին Մարիետան՝ հավելելով. «Էս մարդիկ էնքան վստահ են, որ վերջ, ամեն ինչ ավարտվեց, արդեն ազատության մեջ են ու ինչ ուզեն՝ կանեն, ուր ուզեն՝ կգնան: Դատարանի վրա էլ թքած ունեն»:
Նշենք, որ ազատամարտիկին ծեծած 4 հոգին էլ կարճ ժամանակ անց հայտնվեցին ազատության մեջ՝ ստորագրությամբ չհեռանալու պայմանով:
Վարդան Թումայնի մարմնի դատաբժշկական փորձաքննությունը դեպքից հետո պարզել էր, որ մահը վրա է հասել գլխին հասցված բութ հարվածների արդյունքում, սակայն մի քանի ամիս առաջ՝ մայիսին, դատաբժշկական կրկնակի փորձաքննություն էր նշանակվել, և պարզվել էր, որ Թումանյանը մահացու հիվանդ է եղել, այդ օրը պետք է մահանար, պարզապես ծեծը համընկել է դրան: Եվ հենց այդ երկրորդ փորձաքննության հիման վրա էլ ամբաստանյալները հայտնվեցին ազատության մեջ՝ չնայած ազատամարտիկի հարազատները վստահ են, որ «մարդասպանները ազատության մեջ հայտնվել են նախաքննական մարմնին կաշառելու արդյունքում»:
«Առաջին լրատվական»-ը տուժողի իրավահաջորդների պաշտպան Հայկ Ալումյանից հետաքրքրվեց՝ արդյոք ամբաստանյալների կողմից իրականացրածը փախուստի փորձ չէ, որը ենթադրում է քերական պատասխանատվություն: Ալումյանը, սակայն, ասաց, որ ինքը տեղյակ չէ կատարվածի մանրամասներից, սակայն «այդ անձինք ազատության մեջ հայտնվել են ստորագրությամբ չբացակայելու պայմանով, և եթե դուրս են եկել քաղաքից, ապա պարտավոր էին դատավորին տեղյակ պահել իրենց քայլերի մասին, ինչը չի արվել, քանի որ նրանք երկու դատական նիստի չեն ներկայացել»:
Նշենք, որ ստորագրությամբ քաղաքից չբացակայելու պայմանով ազատ արձակված երկու ամբաստանյալներն էլ ձերբակալված չեն առանց թույլտվության քաղաքից բացակայելու համար, որը կարող է և որակվել որպես փախուստի փորձ:
