Ջուդ Լոուն հրաժարվել է «Ջեյնը զենք է վերցնում» (Jane Got a Gun) վեսթերնում նկարահանումներից։ Այս մասին գրում է Deadline-ը:
Դերասանը հայտարարել է նախագծից իր հեռանալու մասին անմիջապես այն բանից հետո, երբ ֆիլմը մնացել է առանց ռեժիսորի: Նկարահանումները պետք է սկսվեին երկուշաբթի՝ մարտի 18-ին, սակայն ռեժիսոր Լին Ռեմսին չհայտնվեց նկարահանման հրապարակում: Նա հրաժարվել էր ժապավենից, սակայն նախագծի մյուս մասնակիցներին նախապես չէր զգուշացրել այդ մասին:
Մասնավորապես, ֆիլմի գլխավոր հերոսուհուն մարմնավորող ու ֆիլմի պրոդյուսեր Նատալի Պորտմանը Ռեմսիի գնալու մասին տեղեկացել է միայն մարտի 18-ին:
Տեղեկություններն այն մասին, որ Ջուդ Լոուն նշանակվել է ֆիլմի գլխավոր դերակատար, մամուլում շրջանառվեցին 2013 թ. մարտի 11-ին: Մինչ այդ ենթադրվում էր, որ ֆիլմում հիմնական բացասական կերպարին մարմնավորելու է Ջոել Էջերթոնը, սակայն վերջինիս առաջարկեցին մարմնավորել դրական հերոսի, երբ ֆիլմում նկարահանվելուց հրաժարվեց Մայքլ Ֆասբենդերը:
Ռեմսի հրաժարականից 1 օր անց ֆիլմի պրոդյուսերը դարձավ Գևին Օ՛ Քոները, որն ավելի վաղ աշխատել է «Հպարտություն ու փառք» և «Մարտիկը» ֆիլմերի վրա:
