Քաթարի Պետություն աշխատանքային այցի շրջանակում ՀՀ փոխվարչապետ, հայ-քաթարական միջկառավարական համատեղ հանձնաժողովի համանախագահ Արմեն Գևորգյանն այսօր Դոհայում հանդիպել է Քաթարի Պետության վարչապետ, արտաքին գործերի նախարար շեյխ Համադ բին Ջաբեր ալ Թանիի հետ:
Քննարկվել են երկու երկրների միջև տարբեր ոլորտներում համագործակցության զարգացման և, հատկապես, տնտեսական կապերի ամրապնդմանն առնչվող հարցեր: Հանդիպմանը նշվել է, որ թե հայկական, թե քաթարական կողմը շահագրգռված են հարաբերությունների խորացմամբ:
Զրուցակիցներն անդրադարձել են միջկառավարական հանձնաժողովի գործունեության հարցերին, անհրաժեշտ համարեցին այս տարվա ընթացքում հանձնաժողովի առաջին նիստի անցկացումը` նկատելով, որ այն նոր ազդակ երկկողմ առևտրատնտեսական կապերի զարգացմանը և արդյունավետ փոխգործակցության հիմք կստեղծի: Քննարկվել են հանձնաժողովի նիստի անցկացման հնարավորություններն ու ժամկետները: Նշվել է, որ կողմերն արդեն համաձայնեցրել են տարբեր ոլորտներում փոխգործակցությանը վերաբերող շուրջ մեկ տասնյակ միջպետական փաստաթղթեր, որոնց ստորագրումն էապես կնպաստի երկկողմ կապերի ակտիվացմանը:
Կարևորվել է նաև գործարար շփումների աշխուժացումը, երկու երկրներում կազմակերպվող միջազգային գործարար համաժողովներին, ցուցահանդեսին գործարարների մասնակցության խրախուսումը: Երկկողմ հարաբերությունների զարգացման տեսանկյունից կողմերն ընդգծել են Հայաստանի և Քաթարի միջև ուղիղ օդային հաղորդակցության հաստատման անհրաժեշտությունը:
Փոխվարչապետը տեղեկություններ է ներկայացրել Հայաստանում իրականացվող տարածաշրջանային նշանակության ծրագրերի մասին` նկատելով, որ հատկապես առևտրատնտեսական ու ներդրումային ոլորտներում առկա է փոխգործակցության մեծ ներուժ: Քաթարի վարչապետը նույնպես ընդգծել է, որ իր երկիրը հետաքրքրված է Հայաստանում ներդրումներ կատարելու և փոխշահավետ ծրագրերի իրականացմանը մասնակցելու հնարավորություններով:
Փոխվարչապետ Ա. Գևորգյանի մյուս հանդիպումը Քաթարի մունիցիպալ գործերի և քաղաքային պլանավորման նախարար Աբդուլռահման բին Խալիֆա ալ Թանիի հետ էր:
Զրուցակիցները քննարկել են համագործակցության հարցեր` ընդգծելով, որ առկա է փոխգործակցության մեծ ներուժ: Կողմերն առանձնահատուկ ընդգծեցին, որ միջկառավարական հանձնաժողովի գործունեության ակտիվացումն էապես կնպաստի առևտրատնտեսական կապերի զարգացմանը: Երկուստեք կարևորվել է հանձնաժողովի նիստի օրակարգում ոլորտային համագործակցության հարցերի ընդգրկումը:
Անդրադառնալով գործակցության կոնկրետ ուղղություններին` զրուցակիցները հեռանկարային են համարել գյուղատնտեսության, գյուղմթերքի արտահանման, քաղաքաշինության ոլորտներում համագործակցությունը: Նշվել է, որ քաթարական կողմը ողջունում է շինարարության ոլորտում հայ մասնագետների ներգրավումը` հաշվի առնելով նրանց փորձն ու հմտությունները, ինչպես նաև պատրաստ է ուսումնասիրել հայկական շինանյութի, մասնավորապես, քարի ներկրման հնարավորությունները: Քննարկվել է նաև Հայաստանի ոլորտային բուհերում քաթարցի ուսանողների պատրաստման հարցը, պայմանավորվածություն ձեռք բերվեց հարցի կապակցությամբ քննարկումները հետագայում շարունակել:
ՏԿՆ հասարակայնության հետ կապերի բաժնից «Առաջին լրատվական»-ին հայտնում են, որ կողմերն առանձնահատուկ կարևորել են երկու երկրների միջև ապակենտրոնացված մակարդակով համագործակցության ձևավորման ուղղությամբ աշխատանքների իրականացումը: Նշվել է, որ արդեն պատրաստ է Երևանի և Դոհայի միջև համագործակցության մասին համաձայնագիրը, որն առաջիկայում կներկայացվի կողմերի ստորագրմանը:
