Ուրանի մաքսանենգության մեջ մեղադրվող երկու հայերի` գործարարի եւ ֆիզիկոսի դատավարությունը բավականին մեծ արձագանք է գտել մի շարք միջազգային պարբերականներում: Հիշեցնենք, որ բրիտանական Guardian-ի տեղեկացմամբ, Վրաստանում կանխվել է մաքսանենգ ճանապարհով երկիր տեղափոխվող 18 գրամ բարձրհարստացված ուրանի վաճառքի փորձը: Արդյունքում ձերբակալվել են երկու հայ, որոնք արդեն իսկ խոստովանական ցուցմունքներ են տվել: Ազգային անվտանգության նախկին փոխնախարար Գուրգեն Եղիազարյանը մեզ հետ զրույցում նշեց, որ դա շատ լուրջ մեղադրանք է. «Ես չեմ պատկերացնում, թե այդ ուրանը ինչպե՞ս կարող էր հայտնվել այդ մարդկանց մոտ, քանի որ հարստացված ուրան Հայաստանում չկա: Եթե դա մեկ այլ բան լիներ, դեռ կմտածեինք, թե միգուցե ատոմակայանից է, բայց ուրանի պարագան ինձ թվում է վրացիներն են արել գործին ավելորդ հնչողություն տալու համար»:
Գուրգեն Եղիազարյանը բացառեց այն հանգամանքը, որ ուրանը մեկ այլ տեղից հնարավոր լիներ բերել: Նշենք, որ կա վարկած, թե ուրանը բերվել է Նովոսիբիրսկից: «Նովոսիբիրսկից բերելը բացառված է, քանի որ ինչպե՞ս է ստացվում, որ ռուսական սահմանի վրա չեն ձերբակալվել, վրացականին ձերբակալվել են»,- կարծիք հայտնեց Գ.Եղիազարյանը:
