Անգլիայի Պրեմիեր լիգայի երրորդ տուրում Լոնդոնի «Արսենալ»-ը հյուրընկալել էր «Լիվերպուլ»-ին:
Հանդիպումը նման էր երկու գործողությամբ ներկայացման: Առաջին խաղակեսում հյուրերը հիանալի էին գործում ու կարողանում էին բացեր գտնել Արսեն Վենգերի թիմի պաշտպանությունում: «Լիվերպուլ»-ի ֆուտբոլիստների մի քանի հարվածներից հետո փայլուն խաղաց Պետր Չեխը, երկու դեպքում էլ տանտերերին փրկեց դարպասաձողը: Առաջին 45 րոպեների ընթացքում լոնդոնցիներին հաջողվեց մեկ անգամ գրավել մրցակցի դարպասը, բայց մրցավարը կասկածելի խաղից դուրս վիճակ արձանագրեց:
Երկրորդ խաղակեսում պատկերը կտրուկ փոխվեց. գրոհում էր «Արսենալ»-ը, փրկվում՝ «Լիվեր»-ը: Լոնդոնյան ակումբը մի քանի դեպքերում կարող էր բացել խաղի հաշիվը, բայց կամ փայլում էր Սիմոն Մինյոլեն, կամ էլ հարվածը մի փոքր շեղ էր ընթանում: Դրվագներից մեկում էլ հարվածը դիպավ ուղղահայաց դարպասաձողին:
Չնայած երկու թիմերի ստեղծած բազմաթիվ պահերի՝ գոլ չխփվեց: Կողմերը բաժանվեցին խաղաղությամբ՝ լուսագրերին այդպես էլ վառ թողելով 0:0 հաշիվը:
Այս խաղից հետո Բրենդան Ռոջերսի թիմը 7 միավորով երրորդն է, իսկ «զինագործներ»-ը 4 միավորով իններորդն են:
