Թուրքական Turkish Aerospace Industry (TAI) ընկերությունն ու շվեդական SAAB կոնցեռնը առաջին թուրքական կործանիչի ստեղծման հուշագիր են ստորագրել: Այս մասին հայտնում է Hurriyet Daily News-ը:
Թուրքիան ՆԱՏՕ-ում, ԱՄՆ-ից հետո, բանակի թվաքանակով զբաղեցնում է երկրորդ տեղը: Թուրքական ռազմաօդային ուժերի ավիապարկը գլխավորապես ներկայացված է F-16 Fighting Falcon կործանիչներով, որոնք հավաքվում են Անկարայում՝ TAI-ի գործարանում, և F-4 Phantom-ներով: Թուրքական ռազմաօդային ուժերի տրամադրության տակ կա F/RF-4E տեսակի 152 և F-16 տեսակի 179 օդանավ: Եվս 10 F-16-ներ պատվիրված են ԱՄՆ-ում: ԶՈՒ արդիականացման ծրագրի շրջանակում Թուրքիան մտադիր է ԱՄՆ-ից գնել 5-րդ սերնդի F-35 տեսակի 100 կործանիչ:
Թուրքիայի վարչապետ Ռեջեփ Թայիփ Էրդողանը բազմիցս հայտարարել է մարտական տեխնիկայի սեփական արտադրության անհրաժեշտության մասին: Թուրքիան ծրագրում է իր առաջին կործանիչը ստեղծել մինչև 2023 թվականը:
