Այս տարի իրանցի զբոսաշրջիկներ Հայաստանում գրեթե չեն երևում՝ ի տարբերություն նախորդ տարիների, երբ մեծ թվով իրանցիներ գալիս էին Հայաստան՝ Նովրուզը տոնելու: Ինչպես «Առաջին լրատվական»-ին հայտնեց «Տաթև» զբոսաշրջային ընկերության ղեկավար Առլեն Դավիդյանը, այս տարի ոչ մի հավելյալ չվերթ չկա, իսկ շաբաթական իրականացվող 3 չվերթների տոմսերը լրիվ չեն վաճառվում:
Այս տարի ՀՀ-ում զբոսաշրջիկների գրավող ոչ մի համերգ չի կազմակերպվել: Դրա պատճառը, ըստ նրա, այն է, որ անցած տարի միաժամանակ մի քանի համերգներ էին կազմակերպվել և, հավանաբար, շահույթ չի ապահովվել: Իսկ իրանցի զբոսաշրջիկների համար, համերգներից բացի, ոչ մի այլ գրավչություն ՀՀ-ում չկա: Այս տարի իրանցիների համար համերգներ կազմակերպվել են Իրաքում, Դուբայում և Անթալիայում, սակայն այդ ուղղություններով էլ հոսքը շատ մեծ չէ, և չի կարելի ասել, որ Հայաստան եկող զբոսաշրջիկները կգնան այնտեղ:
Ա.Դավիդյանի խոսքերով՝ այս պասիվության վրա ազդել է նաև իրանական արժույթի զգալի արժեզրկումը:
«Բացի դա, Հայաստանը գնային առումով շատ չի փայլում: Եթե անգամ թանկ չլիներ, իրանցիները կնախընտրեին գնալ Իրաք կամ Դուբայ, քանի որ այնտեղ եղանակային պայմաններն ավելի գրավիչ են»,- ասաց Ա. Դավիդյանը՝ նշելով, որ մեր երկիր իրանցիների հոսքն արդեն 3-4 տարի հետզհետե նվազում է, և առանց որևէ շահագրգռող մի բանի 72 միլիոնանոց շուկան կորցնում ենք:
Նրա հաշվարկով՝ այս տարի Նովրուզի օրերին առավելագույնը կընդունենք 3-4 հազ. իրանցիների, որոնցից ոչ բոլորն են զբոսաշրջիկ, մինչդեռ անցած տարի այդ ցուցանիշն իրականում 7-8 հազ. է եղել: Եթե հաշվենք, որ յուրաքանչյուր զբոսաշրջիկ մոտ 1000 դոլարի չափ գումար էր ծախսում ՀՀ-ում, ապա այս տարի չստացված շահույթը կկազմի առնվազն 4 մլն դոլար:
