vԹուրքական Son dakika լրատվական կայքի փոխանցմամբ՝ քրդամետ «Ժողովուրդների դեմոկրատական» կուսակցության (ԺԴԿ) համանախագահ Սելահաթթին Դեմիրթաշը կուսակցության կենտրոնական գործկոմի նիստից առաջ լրագրողների հետ զրույցում հայտարարել է, որ մտադիր է մասնակցել կառավարական կոալիցիա ձևավորելու մասին բանակցություններին:
«Թուրքիայի վարչապետ Ահմեթ Դավութօղլուն պետք է անհապաղ վայր դնի կառավարություն ձևավորելու լիազորությունը։ Եթե կառավարություն ձևավորելու (նախագահական) հրամանը փոխանցվի «Ժողովրդա-հանրապետական» կուսակցությանը (ԺՀԿ), ապա մենք կհայտնենք մեր հայացքներն ու չենք խուսափի պատասխանատվությունից։
Եթե ԺՀԿ-ն ցանկանա, մենք անպայմանորեն կբանակցենք նրա հետ։ Ակնկալվում է, որ նախագահը կառավարություն ձևավորելու լիազորությունները կհանձնի երկրորդ խոշոր կուսակցությանը։ Մենք մեր դռները փակել ենք «Արդարություն և զարգացում» կուսակցության (ԱԶԿ) առջև, իսկ ԺՀԿ-ի հարցում մենք «կանաչ լույս» ենք վառում»,- ասել է նա։
Անդրադառնալով նրան, որ Թուրքիայի նախագահ Ռեջեփ Էրդողանը ցանկանում է փոխել երկրի կառավարման համակարգը, Դեմիրթաշը հայտարարել էր, որ կառավարման նախագահական համակարգին անցում կատարելու հարցը պետք է դրվի հանրաքվեի, և եթե ժողովուրդը ցանկանա, ապա սահմանադրությունը կենթարկվի փոփոխության։
