Կալիֆոռնիայի Սան-Մատեո քաղաքի դատարանը մեկ տարվա ազատազրկման է դատապարտել Սան-Ֆրանցիսկոյում Ճապոնիայի հյուպատոսության փոխհյուպատոս Յոսիակի Նագայային՝ իր կնոջը բազմիցս ծեծի ենթարկելու համար: Այս մասին հայտնում է Contra Costa Time պարբերականը:
Համաձայն քրեական գործի նյութերի՝ կինը ծեծի է ենթարկվել 2011-ի հունվարից ի վեր: Նա իրեն պատճառված վնասները ֆիքսել է լուսանկարով և վերջապես դիմել ոստիկանություն: Դիվանագետը մեղադրվել է բռնության 17 դրվագով, որից 10-ը մերժվել են դատավարության ընթացքում՝ ներառյալ կնոջ այն հայտարարությունները, թե Նագայան կոտրել է իր ատամը և պտուտակահանով իրեն վնասվածք պատճառել:
Նագայան որպես ԱՄՆ-ում Ճապոնիայի հյուպատոսության գործող աշխատակից չի կարող դատապարտվել քրեորեն պատժելի փոքր իրավախախտման համար, սակայն նրա դիվանագիտական անձեռնմխելիությունը չի տարածվում լուրջ քրեական հանցագործությունների վրա՝ նշում է թերթը: Դատավճռի հրապարակումից հետո Նագայան դատարանի դահլիճը լքել է 350 հազար դոլար գրավի դիմաց, սակայն մայիսի 4-ին պետք է բանտ գնա:
Պատժաժամկետը լրանալուց հետո Նագայան ևս 3 տարի կգտնվի պայմանական ազատազրկման մեջ և ընտանիքում բռնության խնդիրների վերաբերյալ 104-ժամյա կրթական ծրագրի կմասնակցի:
