Հանրապետական խմբակցության պատգամավոր, երգչուհի Շուշան Պետրոսյանը միակն էր ողջ Ազգային ժողովում, ով երեկ դեմ քվեարկեց կառավարության ներկայացրած՝ «Այլընտրանքային ծառայության մասին» Հայաստանի Հանրապետության օրենքում փոփոխություններ և լրացումներ կատարելու մասին» օրինագծին:
Հիշեցնենք, որ կառավարության այս օրինագծի համաձայն՝ զինվորական ծառայության ժամանակ որոշակի մեղմացում է նախատեսվում այլընտրանքային զինծառայողների, մասնավորապես՝ կրոնական փոքրամասնությունների համար: Կարծիք կա, թե խոսքը վերաբերում է հատկապես Եհովայի վկաներին:
Այս օրինագիծը երեկ ԱԺ-ում առաջին ընթերցմամբ ընդունվեց 103 «կողմ», 5 «ձեռնպահ» և 1 «դեմ» ձայների հարաբերակցությամբ: «Ձեռնպահ» էին քվեարկել ընդդիմադիր խմբակցությունների պատգամավորները: Հանրապետական, «Բարգավաճ Հայաստան» և «Օրինաց երկիր» խմբակցությունները «կողմ» էին քվեարկել:
Իսկ ինչո՞ւ Շ. Պետրոսյանը դեմ գնաց իր խմբակցության որոշմանը և «դեմ» քվեարկեց այդ օրինագծին՝ հարցին ՀՀԿ պատգամավորը պատասխանեց. «Որովհետև ես կարծում եմ, որ մեր երկրում բոլորը պետք է ծառայեն: Զինծառայության տարիքի յուրաքանչյուր տղա, ով չունի առողջական խնդիր, պետք է ծառայի: Եվ ես դեմ եմ այլընտրանքային ծառայություն հասկացությանը»:
Ի պատասխան մեր դիտարկման՝ բայց չէ՞ որ ՀՀ բանակում այլընտրանքային ծառայության ներդրումը միջազգային այն կառույցների պահանջն է, որոնց անդամակցում է մեր երկիրը, Շ. Պետրոսյանն ասաց. «Հասկանում եմ, բայց ինձ համար սա այն դեպքը չէ, որ պետք է նման պահանջներին ընդառաջ գնանք»:
