Թուրքական Dünya Bülteni լրատվական կենտրոնի փոխանցմամբ՝ հայտնի է դարձել «Արդարություն և զարգացում» կուսակցության (ԱԶԿ) նախագահ, Թուրքիայի վարչապետ Ահմեթ Դավութօղլուի և «Ազգայնական շարժում» կուսակցության (ԱՇԿ) նախագահ Դևլեթ Բահչելիի հանդիպման ժամանակը։
Ընդգծվում է, որ կրիտիկական այդ հանդիպումը տեղի է ունենալու օգոստոսի 17-ին՝ ժամը 14.00-ին, խորհրդարանի շենքում։ Այդ հանդիպման ժամանակ կողմերը քննարկելու են կոալիցիա ձևավորելու հարցը։ Դավութօղլուն երեկ կոալիցիա ձևավորելու հարցով երրորդ և վերջին անգամ հանդիպեց «Ժողովրդա-հանրապետական» կուսակցության (ԺՀԿ) առաջնորդ Քեմալ Քըլըչդարօղլուի հետ, սակայն մեկուկես ժամ տևած հանդիպումն ավարտվել էր անարդյունք։
Դրանից հետո Դավութօղլուն հայտարարել էր Թուրքիայում արտահերթ խորհրդարանական ընտրություններ անցկացնելու հնարավորության մասին։ Թուրքիայում կոալիցիոն կառավարություն ձևավորելու վերջնաժամկետն ավարտվում է օգոստոսի 23-ին։
