Ադրբեջանական Turan լրատվական գործակալության փոխանցմամբ՝ ԵԽԽՎ-ի՝ ժողովրդավարության, մարդու իրավունքների ու մարդասիրական հարցերով հանձնաժողովի նախագահ Իզաբել Սանթոսը երեկ դատապարտել է Ադրբեջանում Լեյլա ու Արիֆ Յունուսների նկատմամբ կայացված դատավճիռը, ըստ որի՝ նրանցից առաջինը դատապարտվել է 8.5, իսկ մյուսը՝ 7 տարվա ազատազրկման:
«Խորապես վշտացած եմ՝ իմանալով դատարանի՝ քաղաքական դրդապատճառներով այսօրվա (երեկվա) որոշման մասին՝ մեկուսացնելու Ադրբեջանում մարդու իրավունքների ամենահայտնի ու ամենախիզախ պաշտպան Լեյլա Յունուսին ու նրա ամուսին Արիֆ Յունուսին։
Ակնհայտ է, որ Ադրբեջանի իշխանությունները ամոթ չեն ճանաչում ԵԱՀԿ-ի նորմերի խախտման հարցում, որոնք պաշտպանում էին Յունուս ամուսինները։ Խոսքը մարդու իրավունքների, ազատ արտահայտվելու ու օրենքի գերակայությունը հարգելու մասին է։ Ադրբեջանում շարունակվում է արագացված հակաժողովրդավարական գործընթացը, և ես Ադրբեջանի կառավարությանը կոչ եմ անում անհապաղ կանգնեցնել այդ միտումը։
Լեյլա ու Արիֆ Յունուսները լուրջ հիվանդություններ ունեն։ Ադրբեջանի կառավարությունը, սակայն, հնարավորություն ունի կատարելու հզոր քայլ, անելու դրական բնույթի հայտարարություն և բանտից ազատ արձակելու Յունուս ամուսիններին՝ առաջնորդվելով մարդասիրական հիմնավորմամբ։ Դիմում եմ իշխանություններին՝ վերանայելու այդ որոշումը»։
