Armtimes.com-ը գրում է. «Երեկ ԱԺ-ում պաշտոնապես շրջանառության մեջ դրեցի «Տեսանկարահանող կամ լուսանկարահանող սարքերով հայտնաբերված ճանապարհային երթևեկության կանոնների խախտումների վերաբերյալ գործերով իրականացվող վարչական վարույթի առանձնահատկությունների մասին» Հայաստանի Հանրապետության օրենքում լրացումներ կատարելու մասին օրենքի նախագիծը: Երկարաշունչ անունով այդ օրենքն է, որ կյանք է տվել երթևեկությանը հետևող տեսախցիկների և արագաչափ սարքերի գործունեությանը և այդ օրենքում է, որ առաջարկում եմ լրացումներ:
Եթե հիշում եք, ս/թ հուլիսի 9-ին հրապարակված՝ «Իշխանությունը պետք է զերծ մնա շրջիկ արագաչափերի կիրառումից, և հրաժարվի արագաչափերով հարստահարման քաղաքականությունից» հոդվածում գրել էի, որ արագաչափերի և երթևեկությանը հետևող տեսախցիկների հարցը առաջիկայում էլ լինելու է իմ ուշադրությանը կենտրոնում՝ որպես ՀՀ քաղաքացիներին հարստահարող համակարգ: Այդ հոդվածում բերել էի բազմաթիվ պաշտոնական փաստեր, որոնք ապացուցում են, որ արագաչափերն ու երթևեկությանը հետևող տեսախցիկները ոչինչ չեն տալիս երթևեկության անվտանգության առումով և միայն հսկայական ֆինանսական բեռ են ավելացնում ՀՀ քաղաքացիների ուսերին և այս տրամաբանությամբ էլ, ներկայացված օրենքի նախագծում խնդրին մոտեցել եմ բացառապես սոցիալական տրամաբանությամբ:
Եվ ահա, նախագծում առաջարկվում է հետևյալը. եթե արագաչափերով արձանագրված խախտումը կատարվել է 15 տարի և ավելի հնության մեքենայով, առնվազն 10 տարվա և 250-ից 350 ձիաուժ շարժիչով մեքենայով, առնվազն 5 տարվա և 120-ից 250 ձիաուժ շարժիչով մեքենայով, մինչև 120 ձիաուժ հզորությամբ ցանկացած տարիքի մեքենայով, բեռնատար մեքենայով, ավտոբուսով կամ միկրոավտոբուսով, այդ դեպքերում նշանակվում է տուգանք Վարչական օրենսգրքով սահմանված տուգանքի կեսի չափով: Ընդգծեմ, որ դա վերաբերվում է միայն արագաչափերով և երթևեկությանը հետևող տեսախցիկներով ֆիքսվող խախտումներին և տարածվում է միայն վերը նկարագրված կատեգորիայի մեքենաների վրա: Այսինքն՝ այս փոփոխությունը չի տարածվում «կենդանի» արձանագրված խախտումների վրա, չի տարածվում նաև այն դեպքերի վրա, երբ արագաչափերով և տեսախցիկներով արձանագրված խախտումներն իրականացվում են ճոխ և համեմատաբար ճոխ մեքենաներով:
Հասկանում եմ, իհարկե, որ այստեղ միանգամից հարց է ծագելու. ինչ կապ ունի՝ ինչ մեքենայով է արվել խախտումը: Խախտումը խախտում է և կապ չունի, թե ինչ մեքենայով է դա արվել: Այս տեսակետը իհարկե, արդարացի է, եթե խնդրին մոտենանք երթևեկության անվտանգության տեսակետից: Բայց հենց դրանում է խնդիրը. կարծում եմ բավարար հիմքեր կան ապացույցված համարելու, որ երթևեկությանը հետևող տեսախցիկները և արագաչափերը ոչ մի կապ չունեն ճանապարհային երթևեկության անվտանգության ապահովման հետ: Որքան շատանում են արագաչափերն ու տեսախցիկները, այնքան շատանում են խախտումները, այսինքն՝ կարգազանց վարորդների թիվը, և ճանապարհատրանսպորտային պատահարներից տուժածների թիվը ոչ միայն չի պակասում, այլև ավելանում է:
Սա նշանակում է, որ այդ սարքերը տեղադրվել են ոչ թե երթևեկության անվտանգությունն ապահովելու համար, այլ որպես ֆիսկալ գործիք, որպես դրամահավաքության մեքենա: և ուրեմն, ներկայիս ծանր սոցիալական պայմաններում՝ միջին խավի և սոցիալապես պակաս ապահով կամ ոչ ապահով խավի համար այդ գործիքը գոնե պետք է գործի կիսով չափ: Առայժմ առավել արմատական պնդում չեմ անում, որովհետև ակնկալիքս ոչ թե քաղաքական հայտարարություն անելն է, այլ այն, որ նախագիծը, կամ դրա լրամշակված տարբերակը (ընդունելի տարբերակ կարող է համարվել, օրինակ, եթե 50 տոկոսանոց «զեղչը» կիրառվի համատարած բոլորի վրա) իսկապես ընդունվի:
Սա ամենևին չի նշանակում, թե այսպիսով համակերպվում ենք արագաչափերի և երթևեկությանը հետևող տեսախցիկների գործունեության այսօրվա բովանդակության հետ:
Նախագծի հիմնավորման մեջ այս կապակցությամբ գրել եմ. «Առաջարկվող նախագիծը դիտարկվում է որպես միջանկյալ քայլ՝ երթևեկությանը հետևող տեանկարահանող և լուսանկարահանող սարքերի գործարկման հետագա նպատակահարմարության, կամ դրանց գործունեությունը ճանապարհային երթևեկության կարգապահության և անվտանգության տեսակետից արդյունավետ դարձնելու հարցերի քննարկումից առաջ»:
Այսպիսով, նշված նախագիծը առնվազն լավ առիթ պիտի դառնա, որպեսզի լրջորեն քննարկենք, թե ինչպես պետք է ազատվենք արագաչափերի և երթևեկությանը հետևող տեսախցիկների անընդունելի հարստահարումից:
Հ.Գ. Նախագիծը լրամշակելու վերաբերյալ առաջարկություններ ունենալու դեպքում խնդրում եմ ինձ գրել [email protected] էլեկտրչոնային փոստի հասցեով:
Նիկոլ Փաշինյան
ԱԺ պատգամավոր
