«Մենք Հայաստանի ներքաղաքական կյանքին չենք խառնվում, Ղարաբաղը Հայաստանի ներքաղաքական կյանքի հետ ի՞նչ կապ ունի: Ես երբեք չեմ ասել, թե միանում եմ Րաֆֆի Հովհաննիսյանին և այլն։ Ես նման կարծիք չեմ հայտնել»,-«Առաջին լրատվական»-ի հետ զրույցում ասաց «Սահմանադրական Արցախ» քաղաքացիական շարժման նախագահ Վիտալի Բալասանյանը։ «Օրինակ, որ Հայաստանը խառնվեր Ղարաբաղի ներքաղաքական կյաքին, Ղարաբաղի համար լավ չէր լինի, ուրմեն մենք էլ ինչու՞ պետք է խառնվենք Հայաստանի ներքաղաքական կյանքին»,- հավելեց նա:
Արձագանքելով մեր այն դիտարկմանը, թե նման կարծիք էր հայտնել ԼՂ ԱԺ անկախ պատգամավոր, «Սահմանադրական Արցախ» շարժման անդամ Վահան Բադասյանը՝ Վ. Բալասանյանը մեզ հորդորեց զրուցել Վ. Բադասյանի հետ:
Վերջինս «Առաջին լրատվական»-ի հետ զրույցում ասաց, որ իրենք պարզապես ցանկացել են կոտրել այն կարծրատիպը, որ եթե Ղարաբաղի իշխանությունները Սերժ Սարգսյանի կողքին են, ապա անպայման բոլոր ղարաբաղցիները պետք է նրանց հետ համակարծիք լինեն։ «Մենք հիմա էլ չենք խառնվում Հայաստանի ներքաղաքական կյանքին, ընդամենը այդ մեկ ելույթով ուզեցել եմ դա ցույց տալ։ Եթե անհրաժեշտություն և պահանջ լինի, նորից կմիանամ, բայց այս պահին մենք չենք խառնվում»,- ասաց Վ. Բադասյանը:
Անդրադառնալով ԱԺ ՀԱԿ խմբակցության պատգամավոր Նիկոլ Փաշինյանի՝ երեկ Ազատության հրապարակում հնչեցրած այն արտահայտությանը, թե իրենք Լեռնային Ղարաբաղի նախագահ Բակո Սահակյանին լեգիտիմ են համարում, Վահան Բադասյանն ասաց. «Դա իրենց կարծիքն է, ես էլ երբեք չեմ ասել, որ Բակո Սահակյանը լեգիտիմ չէ, ես պարզապես ասել եմ, որ Ղարաբաղի նախագահական ընտրությունները Հայաստանի ընտրությունների պաշտոնական շարունակությունն են: Ես ասել եմ, որ այստեղ էլ են ընտրությունները կեղծվել, բայց չեմ ասել, թե Բակո Սահակյանը լեգիտիմ նախագահ չէ: Միգուցե, եթե ընտրությունները չկեղծվեին նա չընտրվեր կամ ընտրվեր 50 գումարած մեկ տոկոսով, ոչ թե՝ 66, ինչպես գրանցեցին պաշտոնական արդյունքները»:
Վահան Բադասյանը հավելեց, որ իրենց կողմից Հայաստանի ներքաղաքական կյանքին անընդհատ խառնվելը կոռեկտ չի լինի, այդ իսկ պատճառով էլ առայժմ ոչինչ չեն անի, բայց երբ լինի դրա անհրաժեշտությունը, կմիանան:
