Լեգենդար երգիչ Մայքլ Ջեքսոնի 3 երեխաները դատի են տվել AEG Live փրոմոութերական ընկերությանը, որն զբաղվում էր փոփ-արքայի վերջին՝ This Is It. համերգային շրջագայության կազմակերպմամբ:
Ջեքսոնի ժառանգները իրենց տատիկի՝ Քեթրին Ջեքսոնի աջակցությամբ կորպորացիայից պահանջում են 40 մլրդ դոլար՝ երգչի վաղաժամ մահվան մեջ մեղադրելով վերջինիս՝ գրում է lifenews.ru-ն:
AEG Live-ն էր վարձել Ջեքսոնի անձնական բժշկին՝ Կոնրադ Մյուրեին, որն ավելի ուշ մեղավոր էր ճանաչվել իր հիվանդի չկանխամտածված սպանության մեջ:
Համաձայն Ջեքսոն ընտանիքի հայցադիմումի՝ նրա երեխաներից յուրաքանչյուրը՝ Փերիսը, Պրինց Մայքլն ու Բլենկետը, պետք է ստանան 10-ական միլիարդ դոլար փոխհատուցում այն եկամուտների հաշվից, որն իրենց հայրը կարող էր վաստակել, եթե ողջ լիներ: Նույնքան գումար է ցանկանում ստանալ նաև երգչի մայրը:
AEG Live ընկերության ներկայացուցիչները հայտարարում են, որ հայցը իրավական որևէ հիմնավորում չունի: Փրոմոութերների կարծիքով՝ Ջեքսոնի կարիերան ցանկացած պարագայում մոտենում էր իր ավարտին:
Դատը սկսվելու է Լոս Անջելեսում՝ ապրիլի 2-ին:
