Թուրքական Cumhuriyet թերթի փոխանցմամբ, ԱՄՆ պետքարտուղարի` Եվրոպայի և Եվրասիայի հարցերով տեղակալ Ֆիլիպ Գորդոնն անդրադարձել է Թուրքիայի Բարձրագույն ընտրական խորհրդի (YSK) կողմից 12 անկախ թեկնածուների թեկնածության վրա վետո կիրառելուն և հայ-թուրքական հարաբերությունների կարգավորմանը.
«Անկախ թեկնածուների վերաբերյալ հատուկ մեկնաբանություններ չեմ կարող գտնել, միայն պետք է նշել, որ մարդիկ քաղաքական պատճառներով չպետք է զրկվեն նման հնարավորությունից:
Ինչ վերաբերում է հայ-թուրքական հարաբերությունների կարգավորմանը, ապա մենք թուրքական կողմի հետ հաճախակի ենք քննարկում տվյալ խնդիրը և մեծ կարևորություն ենք տալիս դրան:
Վերջին շրջանում այդ գործընթացը կորցրել է իր տեմպը: Այդ կապակցությամբ մենք հայտնել ենք մեր մտահոգությունը, քանզի կարծում ենք, որ հայ-թուրքական հարաբերությունների կարգավորումն ու բարեկամական հարաբերությունների հաստատումը բխում են երկու երկրների շահերից:
Դրա համար էլ մենք ամեն կերպ աջակցում ենք երկու երկրների միջև երկխոսությանն ու հարաբերությունների կարգավորմանը: Երկու կողմերի հետ էլ մենք հաճախակի հանդիպումներ ենք ունենում և դրանցում օրակարգ ենք բերում այդ թեման»:
Հիշեցնենք, որ այս տարվա մարտի սկզբներին էլ Ֆիլիպ Գորդոնը հայտարարեց, որ ԱՄՆ-ը Եվրոպայի հետ միասին կշարունակի աջակցել Թուրքիայի և Հայաստանի հարաբերությունների կարգավորմանը, ինչպես նաև կակտիվացնի իր գործունեությունը ԵԱՀԿ Մինսկի խմբում` ղարաբաղյան հակամարտության կարգավորման հարցում Հայաստանին ու Ադրբեջանին օգնելու համար:
