Կանադան արդեն 48.5 մլն դոլարի մարդասիրական օգնություն է տրամադրել սիրիացի փախստականներին, որոնք ապաստան են գտել հարևան երկրներում: Ինչպես հաղորդում է ITAR-TASS-ը, այս մասին հայտարարել է Կանադայի արտգործնախարար Ջոն Բերդը՝ հավաստիացնելով, որ կառավարությունը «պատրաստ է ավելին անել սիրիացի ժողովրդի համար»:
«Անցած 24 ամիսների ընթացքում՝ Ասադի վարչակարգի դեմ սիրիացի ժողովրդի ապստամբության սկզբից ի վեր, սպանվել են հազարավոր սիրիացիներ, ավելի քան 1 մլն մարդ փախել է հարևան երկրներ, ավելի շատ մարդիկ ստիպված են եղել լքել իրենց տները և տեղափոխվել Սիրիայի այլ քաղաքներ: Կանադան կշարունակի օգնել Սիրիայի ժողովրդին այդ ծանր շրջանում»,- ասել է նա տարածած հաղորդագրության մեջ:
Բերդի խոսքով՝ Օտավան «պատրաստվում է ուժեղացնել ճնշումը Բաշար Ալ-Ասադի նկատմամբ, որպեսզի նա դադարեցնի արյունահեղությունը և հրաժարվի իշխանությունից»:
Կանադան, ի տարբերություն ԱՄՆ-ի և մի շարք եվրոպական ու արաբական երկրների, դեռ չի ճանաչել ընդդիմադիրների Ազգային կոալիցիան և կարծում է, որ նրան ուղղակի ֆինանսական օգնություն տրամադրելը չափազանց ռիսկային քայլ է:
