«ՀՀ-ն իր մեջ կատարվող փոփոխություններով շատ ավելի առաջ է, քան երկու տարի առաջ»,- անդրադառնալով միջազգային կառույցների կողմից Հայաստանում ժողովրդավարության վիճակի վերաբերյալ քննադատություններին` ասաց ԱԺ ՀՀԿ խմբակցության պատգամավոր Հովհաննես Սահակյանը:
Նա նշեց, որ իշխանությունները հաստատակամ են իրենց քայլերում փոփոխությունների գնալու հարցում: «Պարզ է, որ ՀՀ իշխանությունները հաստատակամ են փոփոխություններին, և այս կամ այն առումով կարող են որոշակի գործընթացների խոչընդոտ հանդիսանալ` տարբեր կազմակերպությունների համար:
Բայց ես խնդրին այլ տեսանկյունից կուզեի նայել. երբ մեր համապետական ընտրություններին մնացել է մոտ մեկ տարի ժամանակ, ընտրական գործընթացների վերաբերյալ նման հայտարարություններ անելով, նման զեկույցներով որևէ դրական քայլ ու տեղաշարժ չենք անում, չենք նպաստում, որ ընտրական պրոցեսները հետագայում խարսխվեն ու իրականացվեն հասարակական բարձր վստահության մթնոլորտի ներքո: Ես չեմ ուզում անձնավորել, բայց երբ միջազգային որևէ կազմակերպություն կամ միջազգային կառույց շահագրգռված է ՀՀ ժողովրդավարացմամբ, ապա ընտրություններից առաջ նման, երբեմն նաև ոչ լիարժեք զեկույցներն ու հրապարակումներն ավելի են խաթարելու մեր առօրյան, հասարակական վստահության մթնոլորտը»,- ասաց պարոն Սահակյանը:
Մեր հարցին` մի՞թե իշխանություններին չի կարելի ընտրություններից մեկ տարի առաջ քննադատել, Սահակյանը նշեց. «Կա մեկ տարի: Դեռևս ոչ մեկը չի կարող կանխատեսել, թե մեկ տարի հետո ինչ պրոցեսների արդյունքում կընթանա ընտրական գործընթացը, և հիմիկվանից պետք չի նախապես տալ գնահատականներ: Մենք ասել ենք, որ ընդդիմության ու միջազգային հանրության կողմից կառուցողական քննադատություններին ականջալուր ենք»:
Հիշեցնենք, որ Հայ ազգային կոնգրեսն ահազանգել էր, որ վերջին շրջանում ՀՀ-ին միջազգային հանրության կողմից հասցվել է 3 հարված. «Հայ ազգային կոնգրեսն ակնկալում է, որ վարչախումբը վերջապես կհրաժարվի որևէ իշխանության անհարիր «տղայական» վարքագծից, շուտափույթ քայլեր կանի ընդդիմության, այսօր արդեն՝ նաև միջազգային հանրության կողմից առաջադրված պահանջների կատարման ուղղությամբ, ինչը բխում է մեր երկրի ու ժողովրդի (իսկ վերջին հաշվով՝ նաև իրենց) շահերից»,- ահազանգել էր Կոնգրեսը։