ԱԺ արտաքին հարաբերությունների մշտական հանձնաժողովի նախագահ, ՀՅԴ ԳՄ ներկայացուցիչ Արմեն Ռուստամյանը, անդրադառնալով ՀՀ վերաբերյալ միջազգային տարբեր կազմակերպությունների հնչեցրած քննադատություններին, տեսակետ հայտնեց, որ երկրի ներքին ու արտաքին քաղաքականությունը շաղկապված է:
«Սա աքսիոմա է: Երկրի ներսում եղած մեր պրոբլեմները միշտ առաջացնում են դրսից երկրի նկատմամբ ճնշումներ: Դա փաստ է: Այս ամենը պետք է տեսնել հենց այդ կապի մեջ: Պետք չէ ակնկալել ու սպասել որևէ երկրի, կառույցի գնահատականին, որ հասկանանք, թե ինչ կա մեր երկրում: Ի վերջո, այս խնդիրները լուծողը մեր ժողովուրդն է` իր քաղաքական կառույցներով»,- ասաց պարոն Ռուստամյանը:
Ըստ նրա` իշխանությունների վարած քաղաքականության արդյունքում տուժում է ժողովուրդը: «Ժողովուրդը ձևավորում է իշխանություններ` լավ, թե վատ, և այդ իշխանություններն էլ տնօրինում են ժողովրդի ճակատագիրը: Սա է, դժբախտաբար, իրականությունը: Եվ ժողովրդի մասը, որ չի ընկալում իր դերն այս ամենի մեջ, նպաստում է, որ նման իշխանությունները երկար, տևական ժամանակ իշխեն ու տնօրինեն մեր ճակատագիրը: Բայց այդ տնօրինման ձևից մենք դժգոհ ենք»,- նշեց նա:
