Կրթության և գիտության նախարար Արմեն Աշոտյանն այսօր լրագրողների հետ հանդիպմանը անդրադարձավ Երևանի պետական համալսարանի դասախոս Արարատ Միրզոյանի՝ աշխատանքից հեռացվելու հարցին: Վերջինս այդ մասին գրառում էր կատարել իր ֆեյսբուքյան էջում:
Հիշեցնենք, որ Միրզոյանն այն նույն դասախոսն է, ով կողմ էր արտահայտվել ուսանողների կազմակերպած դասադուլին:
Ա. Աշոտյանը նշեց, որ իր ունեցած տեղեկություններով՝ Միրզոյանը ժամավճարով է դասախոսել, իսկ պետական համալսարանում տարեկան բազմաթիվ այդպիսի դասախոսներ են աշխատում, որոնց պայմանագիրն ավարտվելուն պես՝ նրանք այլևս չեն դասավանդում համալսարանում:
Ըստ Արմեն Աշոտյանի՝ ԵՊՀ-ում ավելի կտրուկ և կոշտ քաղաքական դիրքորոշում ունեցող դասախոսներ կան, ովքեր հենց այս պահին դասավանդում են համալսարանում. «Ես Արարատին ճանաչում եմ շատ վաղուց և չեմ ուզում վիրավորել, բայց նրանից ավելի կտրուկ քաղաքական դիրքորոշում ունեցող դասախոսներ կան»,- ասաց նա:
ԿԳ նախարարն անդրադարձավ նաև մի խումբ ուսանողների կողմից ռեկտորի օգնական Գևորգ Մելքոնյանի հրաժարականի պահանջին:
«Ինչպես արդեն բոլորդ տեսաք, հայ ուսանողությունը դեմ է դասադուլին, ուսանողները սովորել են ուզում, այդ պատճառով էլ բողոքի այդ տեսակը կարճ ժամանակ անց մարեց: Եթե հետևեք բնապահպան ակտիվիստներից մեկի ֆեյսբուքայն էջի նկարներին, ապա սարսափելի մի նկար կտեսնեք այն մարդկանց մասին, ովքեր դեմ են արտահայտվել դասադուլին: Մարդիկ էլ գուցե պետք է և գուցե արդեն իսկ պատասխանել են նրանց: Ուսանողությունն ապացուցեց, որ ինքը դեմ է դասադուլին, ես էլ առհասարակ դեմ եմ բուհը քաղաքականացնելուն»,-ասաց նա:
Լրագրողների այն հարցին, թե ինչո՞վ է պայմանավորված այն, որ վերջերս դպրոցներում ավելացել են աշակերտներին ծեծի միջոցով պատժելու դեպքերը, ԿԳ նախարարը նշեց, որ մամուլի համար գայթակղիչ է ամեն մի բռնություն դարձնել օրվա թեմա՝ առանց դրա հավաստիությունը ստուգելու:
«Ուսուցիչները չպիտի դառնան հանրային քննարկման զոհ: Երբ ինչ-որ ուսուցիչ թույլ է տալիս իրեն ոչ նորմալ վարք, ինչո՞ւ ենք մենք անհամարժեք բաներ սպասում: Ծեծը, բռնությունը երեխայի նկատմամբ չեն արդարացվում և ոչ մեկի կողմից, իսկ ես էլ շոումեն չեմ, որ ինձ ահազանգեն, ես էլ ելնեմ, սուրս ճոճեմ ու հրահանգ տամ, որ այս կամ այն ուսուցչին աշխատանքից ազատեն: Պատիժները պետք է լինեն համարժեք. ի՞նչ անենք այդ մարդկանց՝ վտարե՞նք երկրից»,- նկատեց ԿԳ նախարարը:
Արմեն Աշոտյանի՝ կրթության և գիտության համակարգում կոռուպցիոն երևույթների դեմ պայքարի ծրագիրը կներկայացնենք ավելի ուշ:
Լուսանկարը՝ PanARMENIAN Photo-ի
